Գերմանիան վերանայում է հարաբերությունները Վրաստանի հետ, իսկ ԵՄ-ին Վրաստանի անդամակցության գործընթացը դադարեցված է, հայտարարել է Վրաստանում Գերմանիայի դեսպան Պետեր Ֆիշերը։ Այդ մասին «Արմենպրես»-ը տեղեկանում է Sputnik գործակալության վրացական ծառայությունից:
«ԵՄ-ին Վրաստանի անդամակցության գործընթացը դադարեցված է, և դա շատ ցավալի է... Ինչ վերաբերում է Գերմանիային, ապա մենք նույնպես վերանայում ենք հարաբերությունները Վրաստանի հետ: Ինչպես գիտեք, մենք ունենք շատ լայն և խորը հարաբերություններ», - լրագրողներին հայտնել է Ֆիշերը։
Ինչպես նշել է դիվանագետը, ԱՄՆ-ի հետ միասին Գերմանիան Վրաստանի զարգացման նպատակով այդ երկրի հետ համագործակցության խոշորագույն դոնորներից մեկն է։
«Մենք որոշել ենք նոր պարտավորություններ չստանձնել Վրաստանի հանդեպ», - հայտարարել է դեսպանը։
Բացի այդ, դիվանագետի տեղեկատվությամբ, Գերմանիայի զինված ուժերը չեղարկել են մասնակցությունն «Արժանի գործընկեր 2024» (Noble Partner) զորավարժություններին։ Միացյալ Նահանգները զորավարժություններն անորոշ ժամանակով հետաձգելու մասին հայտարարել է հուլիսի սկզբին։
«Մենք չեղարկել ենք իրավական հարցերով մեծ համաժողովը, որը տեղի է ունեցել անցյալ տարի Թբիլիսիում և պետք է տեղի ունենար այս ամառ Բեռլինում: Մենք դիտարկում ենք հետագա գործողությունները», - հավելել է Ֆիշերը:
Արևմուտքը խստորեն քննադատել է Վրաստանի իշխանություններին «Օտարերկրյա ազդեցության թափանցիկության մասին» օրենքի ընդունման համար։ ԱՄՆ-ն հայտարարել է Վրաստանի հետ հարաբերությունների վերանայման, «ժողովրդավարության խախտման» համար պատասխանատու անձանց պատճառով վիզային սահմանափակումների ներմուծման մասին, ինչպես նաև հետաձգել է համատեղ զորավարժությունները։ Իսկ ԵՄ երկրների ղեկավարները համաձայնության են եկել դադարեցնել կառույցին Վրաստանի անդամակցության գործընթացը և սառեցնել 30 միլիոն եվրոյի տրամադրումը Վրաստանի պաշտպանության նախարարությանը։
Ներկայում Վրաստանը Եվրամիության անդամակցության թեկնածու երկիր է։ Երկիրն այդ կարգավիճակը ստացել է 2023 թ․ դեկտեմբերին՝ Ուկրաինայից և Մոլդովայից մեկ տարի անց։
