Երեք միլիոն վարչապետերը տեր ունենալու կարիք չունեն, որովհետև իրենք ո՜չ հպատակ են, ո՜չ ստրուկ են, ո՜չ էլ առարկա են, որ տեր ունենան։ Այս մասին այսօր Ազգային ժողովում կառավարության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը։
Նա նշեց, որ քաղաքացին տեր չպետք է ունենա, քանի որ ինքն է տերը։ Ինչ վերաբերում է «Հայաստան» խմբակցության պատգամավոր Ագնեսա Խամոյանի դիտարկմանը, թե մի բաժակ ջուր ԱԺ դահլիճ բերելու համար մի ամբողջ «զորք» է կանգնած, վարչապետն ասաց․«Այ որ էդ ջուրը տենց ներս եք բերում, դա նրանից է, որ ձեր կուսակցության նախկին անդամը ավտոմատ է ներս բերել ՀՀ ԱԺ և կոտորել է ԱԺ վերնախավին։ Ձեր խմբակցությունում էլ կան դաշնակցոթյան նախկին անդամներ, ովքեր ասում են մահապարտներ ենք հավաքելու։ Եթե ձեզ թվում է իդիալական են անում, ես այդ կարծիքին չեմ, որ իդիալական են անում, կարող են շատ ավելի լավ անեն։ Դա այդպես է, որովհետև այս երկրում եղել է 1996 թվականի սեպտեմբերի 26, երբ զաբորներ ջարդելով մտել են ԱԺ և ծեծուջարդ են արել»։
Ինչ վերաբերում է թմրանյութերին, ապա նա ասաց, թե ընդդիմությունը ինչի չի խոսում, որ Ֆրանսիայի հրապարակում ազգը փրկելու համար վրաններում այնքան թմրանյութ կար, որ դրանից մարդիկ մահանում էին։ «Բա եթե ընդդիմադիր ճամբարում «պերեդազիրովկից» մարդ է մահանում Երևանի քաղաքի կենտրոնում օրինականության համար մղվող պայքարում, ումից եք բողոքում»,-ասաց նա։
