Բաժանորդագրվեք Zarkerak.am-ի տելեգրամ ալիքին։
«Այդ շփումից հետո կարճ հաղորդագրություն է տարածվել, որտեղ նշվում է, որ եղել է հանդիպում, քննարկվել է խաղաղության օրակարգը: Դրանից ինչ-որ եզրահանգումների գալ չենք կարող, սակայն կարող եմ ասել, այն որ Ալիևի հետ եղել է շփում՝ դրական եմ գնահատում, ավելի դրական եմ գնահատում այն, որ եղել է Էրդողանի հետ շփում, որին հետո միացել է Ալիևը: Ցանկացած բանակցություն այսօր դրական է մեզ համար»,-Zarkerak.am-ի հետ զրույցում անդրադառնալով վարչապետ Նիկոլ Փաշինյանի Տիրանայում Ադրբեջանի և Թուրքիայի նախագահների հետ ունեցած կարճ շփմանը՝ ասաց քաղաքագետ Դավիթ Ստեփանյանը:
Հանդիպումների ֆոնին և՛ ԵԽ-ից, և՛ ԵՄ-ից հայտարարություններ հնչեցին, որ Հայաստանն ու Ադրբեջանը մոտ են համաձայնության հասնելուն: Մեր այն հարցին, թե արդյոք նմանատիպ հայտարարությունների առիթ են հանդիսացել վերը նշված շփումները՝ քաղաքագետն ընդգծեց. «Ցանկացած դեպքում նմանատիպ հանդիպումներն առիթ են բոլոր շահագրգիռ կողմերի համար, որպեսզի Հարավային Կովկասում լինի խաղաղություն: Շահագրգիռ կողմեր ասելով նկատի ունեմ՝ ԵՄ-ն, Ֆրանսիան, Գերմանիան, ԱՄՆ-ն, Թուրքիան, այս բոլոր կողմերը շահագրգռված են, որովհետև այս պահին կա առճակատում, որը գնալով միայն խորանում է, հյուսիսային միջանցքը փակ է, հարավային միջանցք չկա, մնում է միակ միջանցքի հնարավորությունը Հարավային Կովկասով, որտեղ Իլհամ Ալիևի ոչ կառուցողական պահվածքը միակ խնդիրն է: Դրա համար էլ Ալիևի, Փաշինյանի և Էրդողանի հանդիպման փաստը կարող է այդպիսի հայտարարությունների առիթ դառնալ»:
Փաշինյան-Ալիև-Էրդողան կարճ հանդիպումից հետո հայ հասարակության մեջ՝ մասնավորապես ընդդիմադիր դաշտում, սկսվեցին քննարկումներ՝ կապված ղեկավարների ցույց տված ժեստերի վերաբերյալ: Ստեփանյանի կարծիքով՝ ճիշտ և քաղաքականապես հիմնավորված չէ դատողություններ անել ժեստերից. «Սա ուղղակի լուրջ մոտեցում չէ, ամեն մեկն իրեն պահում է այնպես, ինչպես իրեն հարմար է, դրա հիման վրա անել դատողություններ՝ կարծում եմ հիմարություն է: Ես ուզում եմ բոլոր քննադատող մարդկանց հիշեցնել, որ նույն Տիրանայում Էմանուել Մակրոնը և Ալիևը գրկախառնվել են և դա նրանից հետո, երբ Ալիևն իրեն թույլ էր տվել լկտի հայտարարություններ և մեղադրանքներ հնչեցնել Մակրոնի հասցեին: Հիմա Մակրոնը գնում է այդպիսի քայլի, որովհետև նա երկրի ղեկավար է և դիվանագետ է, իր համար իր երկրի շահն առաջնային է: Այս համատեքստում Նիկոլ Փաշինյանն անում է այն, ինչ պարտավոր է անել, դա նրա պարտքն է, նրա պարտականությունը: Ես այն մարդկանց թվում եմ, որոնք նույնիսկ կարող են արդարացնել նրա Մոսկվա այցը, եթե դրանից ՀՀ-ն շահել է: Եթե մենք դրանից ունեցել ենք մի փոքր առաջընթաց, այո, Նիկոլ Փաշինյանը պարտավոր էր գնալ Մոսկվա, հանդիպել դիկտատորների հետ: Քաղաքական գործիչների մոտ ամեն ինչը թելադրվում է երկրի պետական շահով: Ինչ վերաբերում է Տիրանայում տեղի ունեցածին, կարծում եմ՝ սա ակնհայտ է, ինչ-որ արվել է՝ արվել է ճիշտ, տեղին»:
Ալիև-Փաշինյան շփման ընթացքում՝ ըստ տարածված հաղորդագրության, խոսվել է խաղաղության գործընթացի շարունակականության մասին: Ըստ քաղքագետի՝ գործընթացի շարունակականության հավանականություն կա, բայց կոնկրետ ժամանակ հնարավոր չէ նշել. «Այն, որ գործընթացը շարունակվելու է, կարծում եմ՝ ակնհայտ է, բայց հենց այս պահին գործընթացը գտնվում է փակուղում: Կարծում եմ՝ Փաշինյանն Ալիևին սուրճի էր հրավիրել, որպեսզի գործընթացն այդ փակուղուց դուրս հանի»:
Այս ամենի համատեքստում հայտարարություն հնչեց նաև Ադրբեջանի նախագահի օգնական Հիքմեթ Հաջիևի կողմից, ով նշեց, որ Հարավային Կովկասում ի հայտ է եկել նոր ստատուս քվո և նոր իրականություն: Դավիթ Ստեփանյանի խոսքով՝ այս հայտարարությունը մանիպուլյացիոն է. «Ես չեմ բացառում առաջընթացը, բայց այստեղ այդքան էլ լավատես չեմ, դա ավելի շատ նման է մանիպուլյացիայի՝ հաշվի առնելով Ադրբեջանի ապակառուցողական մոտեցումը: Ադրբեջանի վրա բոլոր կողմերից ճնշում է, բոլորին պետք է միջին միջանցք մեր տարածքով: Հիմա, եթե պետք է միջանցք, հետևապես պետք է խաղաղություն, եթե պետք է խաղաղություն, ապա Ալիևը պետք է նստի իր տեղը և ընդունի իրողությունը, եթե չի ընդունում, ուրեմն ձգտում է ավելիին, ուրեմն ինքը պոտենցիալ ագրեսոր է և ձգտում է նոր պատերազմի: Ինքը դա բացահայտ չի կարող ասել, պետք է այսպիսի հայտարարություններ անի, սա ավելի շատ պաշտպանական ռեակցիա է»:
