«Ուզում եմ մեր ընդդիմադիր գործընկերների «հայրենասիրական» ելույթներին արձագանքել»,- ԱԺ նիստում ասաց ԱԺ փոխխոսնակ Հակոբ Արշակյանը և ներկայացրեց Ռոբերտ Քոչարյանի հարցազրույցից, 2008 թվականին Լևոն Տեր-Պետրոսյանի ելույթից հատվածներ:
Արշակյանը հարցով դիմեց ընդդիմադիրներին. «Ես մի հարց եմ ուզում տալ ընդդիմադիրներին, հարցը հետևյալն է՝ Ղարաբաղը հայրենիք է, իսկ Մեղրին՝ ո՞չ: Այդ ինչպես էր կարելի Մեղրիի շրջանը փոխանակել Ղարաբաղի հետ և որն է ձեր հայրենիքը, ուզում եմ այս հարցին պատասխանեք՝ արդյոք հայրենիքի ինչ-որ կտոր փոխանակման առարկա է»:
Արշակյանը ներկայացրեց նաև Սերժ Սարգսյանի հարցազրույցից մի հատված կապված այն հարցի հետ, թե ինչու ՀՀ-ն չի ճանաչում Արցախի անկախությունը, ինչպես նաև խոսեց Արցախի նախագահ Արայիկ Հարությունյանի ելույթի մասին. «Ես մի մեջբերում եմ ուզում կարդալ Արցախի նախագահ Արայիկ Հարությունյանի ուղերձից, որը կոչ է Ադրբեջանի ժողովրդին ու իշխանությանը, այն է վերջ տալ Արցախի ժողովրդի հանդեպ ատելության ու ցեղասպանական քաղաքականությանը, պատրաստ լինել իրապես ընդունել ժողովուրդների իրավահավասարության սկզբունքը և Արցախի հանդեպ բնիկ հայ ժողովրդի տիտղոսն ու իրավունքները: Արցախի մեր հայրենակիցները պատրաստ են միջազգային ձևաչափով երկխոսության, հակամարտության կարգավորման և խաղաղության, սակայն միջազգային իրավունքի նորմերի ու սկզբունքների, հատկապես ժողովուրդների իրավահավասարության և ինքնորոշման իրավունքի, ուժի և ուժի սպառնալիքի չկիրառման, վեճերի խաղաղ կարգավորման և տարածքային ամբողջականության սկզբունքների հիման վրա: Ուզում եմ ասել, որ մեր մոտեցումն էլ է նույնը: Այդ միջազգային ձևաչափով պետք է այս բոլոր հարցերը քննարկվեն Բաքվի և Ստեփանակերտի միջև»,-նշեց Արշակյանը:
Անդրադառնալով ընդդիմադիրների ելույթներին, թե ինչպիսի սպառազինություններ են գնվել տարբեր ժամանակներում, մեղադրանքներին, որ գործող իշխանությունը կոտրել է բանակի ողնաշարը՝ ԱԺ փոխնախագահը հարց հնչեցրեց. «Ո՞րն է եղել Ապրիլյան քառօրյա պատերազմը 44-օրյայի չվերածելու գինը: Ո՞րն է եղել գինը, որ 4-րդ օրը պատերազմը դադարել է: Արդյոք դադարե՞լ է նրա արդյունքում, որ հայկական զինված ուժերը ահռելի ջախջախիչ հարված են հասցրել ադրբեջանական զինված ուժերին: Եվ, եթե այդպես է, ինչո՞ւ չեն շարունակվել այդ ռազմական հաջողությունները»:
Մանրամասները՝ տեսանյութում.
