Աջափնյակ վարչական շրջանում մետրոյի կայարանի նախագծման մրցույթում հաղթել է ռուսական «Մետրոգիպրոտրանս» ընկերությունը: Երևանի քաղաքապետի մամուլի խոսնակ Հակոբ Կարապետյանը Zarkerak.am-ի հետ զրույցում հայտնեց, որ խոսքը ոչ թե կայարանի շինարարության, այլ նախագծման մրցույթը շահելու մասին է:
«Ըստ մրցույթի պայմանների, կայարանի նախագծման աշխատանքները պետք է իրականացվեն պայմանագիրը կնքելուց հետո՝ շուրջ 1,6 տարվա ընթացքում: Գործընթացը բավական ձգձգվել է, բայց ամեն դեպքում այն ընթացքի մեջ է»:
Նա նաև տեղեկացրեց, որ նախագծման պատվերի արժեքը՝ մոտ 1.8 մլրդ դրամ է:
«Մետրոգիպրոտրանս» ընկերության տնօրենների խորհրդի նախագահ Վալերի Աբրամսոնը նաև հայտնել էր, որ «Մետրոգիպրոտրանսը» պատրաստ է 500 մլն դոլարի ներդրում անել Երևանի մետրոպոլիտենի ընդհանուր զարգացման մեջ:
Աջափնյակի մետրոյի կայարանը պետք է տվյալ վարչական շրջանը կապի «Բարեկամություն» կայարանի հետ: Կարեն Դեմիրճյանի անվան Երևանի մետրոպոլիտենը ներկայումս ունի 10 կայարան և ավելի քան 12 կմ ընդհանուր շահագործվող երկարության գիծ: Մետրոյի վագոնային պարկը բաղկացած է 45 վագոնից, շահագործվում է 33-ը։