Բաժանորդագրվեք Zarkerak.am-ի տելեգրամ ալիքին։
«Դժբախտաբար, բանակցությունների հույսերն արդեն պակասել են պատերազմը շարունակվում է»,- անդրադառնալով Իրանում ստեղծված իրավիճակին այս մասին Zarkerak.am-ի հետ զրույցում ասաց իրանահայ Ռուբեն Շահբազյանսը:
Հունիսի 13-ի գիշերը Իսրայելը զանգվածային հարվածներ է հասցրել Իրանին։ Գործողության հայտարարված նպատակն էր խափանել Թեհրանի աշխատանքը միջուկային ծրագրի վրա։ Ի պատասխան՝ իրանական կողմը սկսել է հարվածներ հասցնել Իսրայելի տարածքին:
Մեր զրուցակիցը հայտնեց, որ տեղի հայ համայնքում զոհեր և վիրավորներ չկան: Սակայն հարակից տարածքում ռումբի ընկնելու հետևանքով վնասվել է Թեհրանում գործող «Ալիք» օրաթերթի շենքը, փշրվել են ապակիները:
«Խուճապ չկա, կա անհանգստություն, մտահոգությունն այն է, որ պատերազմը կշարունակվի» ,- ասաց Շահբազյանսը՝ խոսելով տեղի հայ համայնքում տիրող տրամադրությունների մասին:
«Որոշակի հոսք կա դեպի Հայաստան, իրանցիները գերադասում են ժամանակավոր գնալ մոտիկ և բարեկամ երկրներ, հայ համայնքից ոմանք էլ ժամանակավորապես տեղափոխվել են Երևան, իմ շրջապատում էլ նման մարդիկ կան» ,- նշեց Շահբազյանսը, սակայն այդ հոսքը տարերային և արտառոց չորակեց: Ասաց՝ այս պայմաններում վիճակագրություն չկա հոսքերի վերաբերյալ:
«Երթևեկության առումով դժվարություններ կային, բենզինի խնդիր էլ կար, սահմանափակ էին վաճառում, որ բոլորին հասնի, բայց դա սկզբի օրերին էր, հիմա անցել ենք բնականոն ընթացքին, այդ հարցը լուծվել է: Առաջին օրերին հացի խնդիր էլ կար, սահմանափակ էին վաճառում, հիմա արդեն նման խնդիր չկա»,-ասաց նա:
Սփյուռքի գործերով գլխավոր հանձնակատարի գրասենյակից էլ Zarkerak.am-ին հայտնեցին, որ Իսրայելից ու Իրանից ՀՀ տեղափոխվելու հետ կապված հայտեր չեն ստացել, երկու երկրներում էլ հայերի շրջանում տուժածներ չկան։
