Բաժանորդագրվեք Zarkerak.am-ի տելեգրամ ալիքին։
Եվրամիության անդամ երկրների անօրինական միգրանտների պահման կենտրոն Հայաստանում ստեղծելու առաջարկ Երևանին չի ներկայացվել։ Zarkerak.am-ի հետ զրույցում ասել է Հայաստանի արտաքին գործերի նախարարի մամուլի խոսնակ Անի Բադալյանը՝ անդրադառնալով Euronews գործակալության հայտնած այն տեղեկություններին, թե ԵՄ խորհրդի՝ օգոստոսի 4-ին կայանալիք նիստում Իտալիան քննարկման է ներկայացնելու մի շարք երկրներում, այդ թվում՝ Հայաստանում, անօրինական միգրանտների պահման կենտրոններ ստեղծելու հարցը։
«Նման հարց մեզ հետ չի քննարկվել»,- նշեց Անի Բադալյանը։
Euronews-ն օգոստոսի 3-ին գրել է, որ ԵՄ խորհրդի՝ օգոստոսի 4-ի նիստում մի շարք երկրներում անօրինական միգրանտների պահման վայրեր ստեղծելու առաջարկը ներկայացնելու է Իտալիայի ներքին գործերի նախարար Մատեո Պիանտեդոսին։
Ըստ Euronews-ի՝ Իտալիան առաջարկում է նման կենտրոններ ստեղծել աֆրիկյան մի շարք պետություններում, ինչպես նաև մի քանի այլ երկրներում, որոնք գտնվում են ավանդական միգրացիոն ուղիներից դուրս։ Հավանական թեկնածու երկրների թվում է նաև Հայաստանի Հանրապետությունը:
Այսպիսի կենտրոնները, ըստ Իտալիայի առաջարկի, կֆինանսավորվեն Եվրամիության միջոցներով։
