2022 թվականի նոյեմբերի 14-18-ը Կիպրոսի Ազգային գվարդիայի ուժերը և Հայաստանի զինված ուժերը համատեղ անցկացրել են «Արծաթե նիզակ 2022» փոքրածավալ հատուկ գործողությունների զորավարժությունները։
Զորավարժությունները տեղի են ունեցել Կիպրոսի Հանրապետության տարածքում՝ Ազգային գվարդիայի հատուկ նշանակության ուժերի հրամանատարության և Հայաստանի զինված ուժերի հատուկ օպերատիվ անձնակազմի մասնակցությամբ։
Կիպրոսի Ազգային գվարդիայի գլխավոր շտաբի հայտարարության համաձայն՝ զորավարժությունների սցենարը ներառել է տարբեր տեսակի անհատական և խմբակային կրակոցներ, ինչպես նաև մարտադաշտում առաջին օգնություն ցուցաբերելու գծով անձնակազմի վերապատրաստում։
Կիպրոսի և Հայաստանի միջև պաշտպանական համագործակցության երկկողմ ծրագրի մաս կազմող զորավարժությունը հատկապես շահավետ է համարվում, քանի որ այն հնարավորություն է ընձեռում Ազգային գվարդիայի հատուկ գործողությունների անձնակազմին մարզվել Հայաստանի զինված ուժերի համապատասխան անձնակազմի հետ՝ այսպիսով նպաստելով փոխգործունակությանը և ընդգծելով երկու երկրների զինված ուժերի գերազանց հարաբերությունները, նշել է աղբյուրը։
