Այսօր՝ մայիսի 4-ին, արտակարգ դեպք է տեղի ունեցել Երևանում: Ժամը 16:55-ի սահմաններում ՀՀ Ներքին գործերի նախարարության Փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Դավիթ Անհաղթ փողոցում՝ «Կերամա Մարացի» խանութ սրահի մոտ կայանված ավտոմեքենայից ծուխ է նկատվում:
Օպերատիվորեն ժամանել են Երևանի թիվ 5-րդ հրշեջ-փրկարարական ջոկատից 1 մարտական հաշվարկ:
Ժամանել են նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 4-րդ գումարտակի 2-րդ վաշտի պարեկները՝ գումարտակի հրամանատար Արմեն Գասպարյանի գլխավորությամբ:
Տարածքը սահմանազատել են նույն վաշտի պարեկներ Գոռ Հախնազարյանն ու Սերոբ Չրաղյանը:
Պարզվել է, որ հրդեհը բռնկվել է Երևանի բնակիչ 34-ամյա Ռուզաննա Ծառուկյանին պատկանող «Hyundai Elantra» մակնիշի ավտոմեքենայում:
Այրվել է ավտոմեքենայի շարժիչի հատվածը՝ ամբողջությամբ և ջերմահարվել է դիմային հատվածը:
Բարեբախտաբար տուժածներ չկան:
