ՀՀ առողջապահության նախարարությունից հայտնում են, որ Առողջապահության համաշխարհային կազմակերպության այս տարվա կարգախոսն է՝ «Մաքուր ձեռքերը կյանքեր են փրկում»։
«Գրիպը, կորոնավիրուսային (COVID-19) և այլ վարակիչ հիվանդությունները կանխելու միջոցառումների շարքում առաջին տեղում հենց ձեռքերի հիգիենայի կանոնների պահպանումն է:
Այս պարզ գործողությունն ամենաարդյունավետ միջոցն է ոչ միայն շատ վարակիչ հիվանդություններից պաշտպանվելու, այլև դրանց հարուցիչների աճի և տարածման ռիսկը նվազեցնելու համար։
Բուժաշխատողների ձեռքերը գործնականում համարվում են ներհիվանդանոցային վարակների փոխանցման հիմնական գործոնը: Ուստի, ձեռքերի ժամանակին և ճիշտ հիգիենիկ մշակումը բուժանձնակազմի և պացիենտների անվտանգության գրավականն է:
Հաշվի առնելով ձեռքերի հիգիենայի կարևորությունը ներհիվանդանոցային վարակների կանխարգելման գործում` Հայաստանում առաջին անգամ հաստատվել են ձեռքերի հիգիենային ներկայացվող պահանջները, որոնք պարտադիր են բոլոր բժշկական կազմակերպությունների համար»,-ասվում է Ան հաղորդագրության մեջ։
