Բաժանորդագրվեք Zarkerak.am-ի տելեգրամ ալիքին։
«ՀՀ պատմության ընթացքում երբևէ պետությունն այնքան մոտ չի եղել իր քաղաքացուն, իր ժողովրդին, քան այժմ: Երբևէ ենթակառուցվածքներն այնքան հասանելի չեն եղել Հայաստանի ամենահեռավոր գյուղին, համայնքին, երբևէ ավիացիան այնքան մատչելի չի եղել, այնքան մոտիկ չի եղել Հայաստանին, աշխարհն այնքան մոտիկ չի եղել յուրաքանչյուր ցանկացողին, ով ցանկանում է այցելել Եվրոպա, Միջին Արևելք, ԱՊՀ երկրներ: Ենթակառուցվածքների տեսանկյունից նույնիսկ ՀԷՑ-ը երբեք այնքան մատչելի չի եղել, այնքան մոտիկ չի եղել իր քաղաքացիներին, որքան հիմա է»,-ԱԺ-ում հայտարարեց ԱԺ փոխնախագահ Հակոբ Արշակյանը:
Ըստ Արշակյանի՝ երբ խոսում ենք պետության մասին, առաջին հերթին, նաև իրավական պետության նկատի ունենք. «Պարեկների աշխատանքն այսօր դժվար է գերագնահատելը, որովհետև կարծում եմ՝ մեր քաղաքացիներն իրենց ամենօրյա շփումների ժամանակ փաստում են, որ երբեք պարեկները, ոստիկաններն այդքան մոտիկ չեն եղել իրենց կարիքների բավարարմանը: Այն ժամանակներում, երբ մարդիկ խուսափում էին փողոցում ոստիկանների հանդիպելիս, ճանապարհներին խուսափում էին պետավտոտեսուչի հանդիպելիս, այսօր արդեն կարելի է արձանագրել՝ նրանց միայն մոտենում են օգնելու նախապայմանով և մարդիկ ուղղակի հաճույք են զգում՝ շփվելով իրենց պետության ներկայացուցիչների հետ: Առողջապահությունը երբեք այդքան մոտիկ չի եղել ընտանիքներին, տարիքով մեծերին փորձում ենք ուղղորդել առողջապահության համակարգ, հաճախ դա մեզ մոտ չի ստացվում, բոլորը թողնում են՝ դանակը հասնում է ոսկորին, նոր են գնում, բայց իրականությունն այն է, որ մարդիկ ուղղակի չէին ցանկանում իրենց ընտանիքներին նեղություն տալ և չէին ուզում իրենց ընտանիքից հացը կտրել իրենց առողջական՝ նույնիսկ կրիտիկականի հասնող խնդիրները լուծելու համար»:
Հակոբ Արշակյանի խոսքով՝ նույնիսկ միջին տարիքի մարդիկ, ում հասանելի է պարտադիր ապահովագրությունը, դիմում են իրենց անընդհատ հետաձգած առողջական խնդիրները լուծելու համար. «Պետությունը երբեք այդքան մոտիկ չի եղել ռազմարդյունաբերողներին: Ռազմաարդյունաբերական համալիրին տրված հարյուրավոր միլիոն դոլարների պատվերները երբեք այսքան մեծ ծավալով չեն եղել: Այս հարցերը ֆունդամենտալ ազդեցություն ունեն ՀՀ կայացման համար: Երբեք ՀՀ-ն, Կառավարությունն այդքան մոտ չի եղել տնտեսվարողներին, որքան հիմա: Մենք ամեն ընտրության օր արթանանում էինք սթրեսով լի, անհանգստությամբ լի էին մինչև 2018 թվականը: Մեր հանրապետության քաղաքացիների գերակշիռ մեծամասնությունը տհաճությամբ էր գնում ընտրատեղամասեր, որովհետև դրանց դիմաց, ներսը տարատեսակ ընտրական օրերին խուլիգանական խմբերի և բակային հեղինակությունների խմբեր էին կուտակվում, քաղաքացին իր քվեն նետում էր քվեատուփը, առավոտյան արթնանում տեսնում էր՝ իր քվեն այնպիսին չի, ինչպիսին ինքը նշել էր և ստիպված էր լինում դուրս գալ փողոց: Այսօր այլևս դրա կարիքը չկա, այսօր քաղաքացին մտնում է ընտրատեղամաս, ամեն ինչ հանգիստ է, թափանցիկ է՝ մտքում ունենալով միանշանակ մեկ պատկեր, այն քվեաթերթիկը, որն ինքը նետելու է քվեատուփի մեջ, որոշիչ է լինելու ՀՀ ապագայի, իր ապագայի և քաղաքական համակարգի ձևավորման համար»:
