Բաժանորդագրվեք Zarkerak.am-ի տելեգրամ ալիքին։
«Այս երկու խաղը հնարավորություն էր մեզ համար, մենք կարող ենք ասել, որ և՛ Հունգարիային, և՛ Իռլանդիային կարող էինք հաղթել»,- Zarkerak.am-ի հետ զրույցում ասաց Հայաստանի ազգային հավաքականի նախկին ֆուտբոլիստ, «Նոա»-ի նախկին մարզական տնօրեն Արթուր Ոսկանյանը:
Հայաստանի ազգային հավաքականը Մունդիալ 2026-ի որակավորման փուլի F խմբում 3-րդ և 4-րդ տուրերում պարտվեց Հունգարիայի (2:0) և Իռլանդիայի (1:0) հավաքականներին: Հայաստանի հավաքականը 3 միավորով եզրափակում է F խմբի մրցաշարային աղյուսակը:
Ոսկանյանն ընդգծեց, որ Հունգարիայի դեմ խաղում չնայած տղաները մինչև վերջին վայրկյանը պայքարեցին, բայց ինչ-որ բան պակասեց. «Մեզ պետք էր ավելի շատ գնդակ պահել, առաջին խաղակեսում շատ ուժ կորցրինք պաշտպանությունում, դրա համար երկրորդ խաղակեսում ինչ-որ պահի ուժերը չհերիքեց: Միայն գոլից հետո սկսեցինք վստահ խաղալ գնդակով ու անգամ պահեր ունեինք, պետք էր հենց առաջին խաղակեսին այդպես խաղալ ու Հունգարիային կհաղթեինք: Ամեն դեպքում թիմում կար կարգապահություն, պահերը չօգտագործելու խնդիր էլ ունեինք՝ նման մակարդակի խաղերում անգամ եթե երկու-երեք հնարավորություն ես ունենում, գոնե մեկը պետք է օգտագործես»:
Խոսելով Իռլանդիայի դեմ կրած պարտության և հավաքականի ավագ Տիգրան Բարսեղյանի կարմիր քարտ ստանալու մասին՝ Ոսկանյանն ասաց. «Տիգրան Բարսեղյանը փորձառու ֆուտբոլիստ է ու շատ կարևոր է, որ նման խաղերում թիմի ավագը կարողանա հանգստություն պահպանել, նա պետք է խաղը հանգստացնողը լինի: Բարսեղյանը պետք է հասկանար, որ նման խաղում իր դերը շատ մեծ էր: Հակառակորդն էլ ուսումնասիրում է, գիտի՝ մենք ինչ բնավորություն ունենք, նրանք դա օգտագործում են, պետք է ավելի տրամադրվել խաղին: Շատ հեշտ է ամեն պարտությունից հետո մեղավորներ գտնել, բայց պետք է ճիշտ վերլուծել ու շարժվել ըստ ծրագրի ու հասնել նպատակին»:
Ոսկանյանի կարծիքով՝ կարմիր քարտ ստանալուց հետո մեր տղաները հոգեբանորեն չկոտրվեցին. «Ֆուտբոլում ամեն ինչ հնարավոր է: Այնպես չէ, որ 10 ֆուտբոլիստով մնալուց հետո շատ էր երևում տարբերությունը, մեր տղաները նորից խաղում էին, պարզապես անկյունայինից հետո սխալ եղավ, կորցրինք ուշադրությունն ու արդյունքում գոլ գրանցվեց: Դրանից հետո էլի մենք կարող էինք պահեր ստեղծել, որովհետև իմ կարծիքով այսօր մենք Իռլանդիայի հավաքականից ավելի ուժեղ ենք: Ամենակարևորն այն էր, որ տղաները պայքարում էին, պարզապես այս խաղում մենք շատ քիչ գոլային պահեր ունեցանք: Պետք է ավելի հարձակողական ֆուտբոլ խաղալ, երկար պաշտպանվելու դեպքում և՛ հոգեբանորեն, և՛ ֆիզիկապես հոգնում ես, մեծ աշխատանք կա անելու, և՛ գոլային պահերի, և՛ դիրքային գրոհների առումով դեռ շատ բացեր կան»:
Ազգային հավաքականը նոյեմբերի 13-ին կհյուրընկալի Հունգարիայի ընտրանուն: Ըստ Արթուր Ոսկանյանի՝ ամենակարևորն այն է, որ ինչ սխալներ թույլ ենք տվել, դրանց վրա աշխատենք և ուղղենք առաջիկա խաղերում. «Եթե դրական արդյունք ունենանք Հունգարիայի դեմ խաղում, կարող ենք Պորտուգալիայի դեմ էլ պայքարել: Դժվար է խոսել շանսերի մասին, բայց ամեն դեպքում պետք է մտածենք միավորներ հավաքելու մասին: Եթե ուզում ենք արդյունքի հասնել, պետք է շատ գրոհներ ունենանք»:
