Հայկական ավանդական ղափաման հայերի, զբոսաշրջիկների շրջանում առավել ճանաչելի դարձնելու, ուտեստի պատրաստման գաղտնիքներին ծանոթացնելու նպատակով Երևանում անցկացվեց տոնական միջոցառում՝ Ղափամայի տոնը:
Շուրջ տասներկու կազմակերպություն՝ ռեստորաններ, խոհարարական ընկերություններ, կրթական հաստատություններ իրենց տաղավարներում ցուցադրում էին ազգային ուտեստն ու այն հյուրասիրում անցորդներին: Ղափամայից բացի ներկայացված էին հալվա, չրեր, դդմով կարկանդակներ, փախլավա, դդմով ապուր և այլն:
«Միջոցառումը յուրահատուկ է, քանի որ ներկայացնում ենք մեր ազգային մշակույթն ի դեմս հայկական ազգային խոհանոցի, որի զարդը ղափաման է: Մեր նպատակը մեր ազգային խոհանոցը հանրահռչակելն ու սերունդն
երին փոխանցելն է, ուստի պատահական չէ, որ մասնակցում են խոհարարական ուսումնական հաստատություններ: Ցանկացել ենք նաև զբոսաշրջությունը խթանել և Վերնիսաժում ենք կազմակերպել միջոցառումը»,-իր խոսքում նշեց Երևանի Կենտրոն վարչական շրջանի ղեկավարի աշխատակազմի կրթության, մշակույթի և սպորտի բաժնի պետ Նելլի Ասատրյանը:
Նա հիշեցրեց՝ կա մի լեգենդ, ըստ որի՝ ղափաման նույնականացվում է երկրագնդի հետ: «Ղափաման Երկիր մոլորակն է, բրինձը՝ բնակչությունը, իսկ ընդեղենը՝ տարբեր կրոնների, ազգությունների ներկայացուցիչներն են: Մեր ուղերձը խաղաղությունն է, որ Երկիր մոլորակի վրա բոլորն ապրեն խաղաղ՝ անկախ կրոնից, ազգությունից, սեռից, համոզմունքից և այլ հանգամանքներից»,-ընդգծեց Նելլի Ասատրյանը:
Միջոցառմանը առանձնահատուկ հյուրասիրությամբ ներկայացավ Ֆրանս-հայկական մասնագիտական ուսումնական կենտրոնը: Կենտրոնի ուսանողները բացի ղափամայից ներկայացրել էին դդումով և այլ բանջարեղեններով կարկանդակներ և բանջարեղենային տոլմա:
Ղափամայի պատրաստման եղանակները չեն փոխվել, բայց տարբեր մարզերում այն յուրովի է պատրաստվում. ամեն տեղ դդումի միջուկը տարբեր է: ՍԵՊՖԱ-ի ուսանողները պատրաստել էին ավանդական ղափամա, ինչն էլ մնացած այլ ուտեստների հետ հյուրասիրեցին ներկաներին:
Միջոցառումն ուղեկցվեց ազգային երգ ու պարով: Ներկա էին բազմաթիվ զբոսաշրջիկներ, որոնք հայկական ուտեստները համտեսելու առիթը բաց չէին թողնում:
Վերջում Կենտրոն վարչական շրջանի ղեկավարի կողմից մասնակից կազմակերպություններն արժանացան հավաստագրի:
