Բաժանորդագրվեք Zarkerak.am-ի տելեգրամ ալիքին։
Զայրույթ, սեր, դավաճանություն, պատերազմական իրավիճակից մնացած տրավմաներ, էմոցիա․ այս ամենը ներկայացվում է Ջոն Օսբորնի «Հետ նայիր զայրացած» պիեսում, որը բեմադրվել է Ֆրիդա Յորքի կողմից: Ներկայացումը տեղի է ունեցել «Թատրոն տանիքում»՝ հանդիսատեսին տալով շատ էմոցիոնալ պահեր:
Ներկայացումը պատմում է մի զույգի մասին, որոնք սիրում են միմյանց, սակայն հարաբերություններում տիրում է լարվածություն, ներքին փոթորիկներ, և այս ամենում կա մի մեծ զգացմունք՝ սեր: Ներկայացումը հանդիսատեսին մինչև ավարտ պահում է էմոցիայի գագաթնակետին՝ անկանխատեսելի իրադարձություններով, դերասանական հուզիչ խաղով: Ներկայացման մեջ խաղում էին հայտնի դերասաններ՝ Ռոզի Ավետիսովան, Արմեն Մարգարյանը, Համլետ Առաքելյանը և Անի Գալստյանը:
Zarkerak.am-ին դերասանուհի Ռոզի Ավետիսովան ասաց, որ այն կարևոր հաղորդակցությունը, որը ներկայացման միջոցով փորձել են հանդիսատեսին փոխանցել՝ սերն է, և այդպիսի սեր մեր ժամանակներում շատ հազվադեպ է պատահում, ինչը հատկապես շատ լավ ընդգծված է իր կերպարում:
«Սիրուն զուգահեռ նաև պատերազմի թեման է ներկայացված և կյանքը, մահը, պատերազմը իրար հետ զուգահեռ գնում են։ Այդ զուգահեռների մեջ մենք բոլորս կորուստներ ու ձեռքբերումներ ենք ունենում, ամեն մեկս պայքարում ենք կյանքի համար մեր ձևով, և ոմանց մոտ ստացվում է, ոմանց մոտ՝ ոչ։ Ամեն դեպքում մենք փորձում ենք հավատալ և ուզում ենք հանդիսատեսն էլ հավատա, որ սերը միակ բանն է, որ փրկում է ցանկացած իրավիճակում»-նշեց դերասանուհին:
Ըստ Ռոզի Ավետիսովայի՝ ինքը և հերոսուհին 2 հակառակ բևեռներ են. «Հերոսուհին իր բոլոր նուրբ և զգացմունքային կողմերի հետ մեկտեղ շատ ուժեղ է, որտեղ միայն ուժեղ մարդը կկարողանա այդպես սիրել, գնալ իր սրտի հետևից։ Ես կարծում եմ, որ անձնապես ես այդ հերոսական բնութագիրը չունեմ, և երևի թե չեմ կարողանա երբևէ այդքան կամքի ուժ դրսևորել»,-ասաց նա:
Համլետ Առաքելյանը նույնպես կարծում է, որ ամեն դեպքում զայրացած մարդուն փրկում է անվերապահ սերը, որը միշտ բժշկում է։
Ինչ վերաբերում է ներկայացման վայրին, դերասանն ասաց, որ ներկայացումները մենակ տանիքում չեն, թատրոնը նաև փողոցում է լինում, մետրոյում է բեմադրվում և այլն՝ այսինքն տարածքը, որը դու ընտրում դառնում է ներկայացման մի մասը։
«Թատրոն Տանիքումը»-ը, որտեղ իրականացվել է ներկայացումը, նկատելի է, որ հետևի պատուհաններից քաղաքը երևում է և դա օգտագործված է քաղաքային տրամադրությունը ստեղծելու համար»,-հավելեց դերասանը:
Դերասանը նույնպես նշեց է, որ չգիտակցված զայրույթը, որը առաջացել է պատերազմի հետևանքով տարիներով կարող է մարդկանց կեղեքել և փչացնել նաև իրենց ու իրենց մտերիմների հարաբերությունները:
