Բաժանորդագրվեք Zarkerak.am-ի տելեգրամ ալիքին։
«Ընտրություններից հետո քաղաքական լարվածություն կամ բողոքի ակցիաներ չեն լինի։ Ընդդիմությունը չունի բավարար հանրային աջակցություն և արդեն գիտակցում է իր պարտությունը»։
Այս մասին լրագրողների հետ զրույցում ասել է Ալեն Սիմոնյանը։
«Գիտեն, որ իրենք ընտրող չունեն, դրա համար ստիպված են փող բաժանել, բայց ես վստահ եմ, որ իրենք արդեն գիտակցել են, որ շատ ուժեղ պարտվելու են և միասին կարող են իրենք դադարել զբաղվել քաղաքականությամբ։ Ընդամենը 7-8 տարի առաջ մենք պայքարում էինք, որ իշխանությունը փող չբաժանի, հիմա պայքարում ենք, որ ընդդիմությունը փող չբաժանի»,- ասել է նա։
Սիմոնյանն անդրադարձել է նաև շարունակաբար բացահայտվող ընդդիմադիր ուժերի կողմից ընտրակաշառքի դեպքերին։ Ըստ նրա՝ իրավապահների արձագանքը խիստ է լինելու։
«Այդ կապիկներին կապիկների համար նախատեսված վանդակներում ենք պահելու, իրենք գնալու են վանդակ հենց ընտրություններից հետո։ Օրենսդրական նախաձեռնություններն արդեն շրջանառության մեջ են դրված․ ընտրակաշառք տալու և բաժանելու համար նախատեսված պատժաչափերը խստացվելու են, այնպես որ թող շատ վախենան»,- հայտարարել է Սիմոնյանը։
Անդրադառնալով հնարավոր հետընտրական գործընթացներին՝ ԱԺ նախագահը բացառել է նման զարգացումները։
«Բացառում եմ։ Եթե ընտրությունները ազատ և արդար են, ինչպես 2018 թվականից սկսած տեղի են ունենում՝ անկախ նրանից, թե ով է հաղթում, նման բան չի կարող լինել։ Դա անհնար է։ Ընդդիմությունն արդեն հասկանում է ընտրությունների հավանական արդյունքը, սակայն շարունակում է խոսել հետընտրական զարգացումների մասին։
Ես պնդում եմ, որ ընդդիմությունը չի կարող հանրահավաք անել։ «Ուժեղ Հայաստանը», «Բարգավաճ Հայաստանը», «Հայաստան» դաշինքը նույնիսկ եթե միավորվեն, չեն կարող լուրջ հանրահավաք կազմակերպել»,- նշել է Սիմոնյանը։
