Բաժանորդագրվեք Zarkerak.am-ի տելեգրամ ալիքին։
«Անվստահություն հայտնելու ակցիան ժամանակավրեպ է և տեխնիկապես անհեթեթ»,-Zarkerak.am-ի հետ զրույցում անդրադառնալով Էդգար Ղազարյանի նախաձեռնած իմպիչմենթի գործընթացին՝ ասաց Գերագույն խորհրդի նախկին պատգամավոր, քաղաքական գործիչ Ազատ Արշակյանը:
Արշակյանի խոսքով՝ այդ գործընթացը լուրջ չէ. «Հայաստանն արդեն այն կարգավիճակն ունի, որ անվստահություն հայտնելու համար հարկավոր է սկսել վստահությունից, մենք վստահում ենք այսինչ մարդուն, նրա քաղաքական ծրագրին, քաղաքական թիմին և անվստահություն ենք հայտնում իքս մարդուն: Այդ մերժումը չպետք է լինի աբորիգենի մակարդակով: Այդ իմաստով դա ոչ պրոֆեսիոնալ ինքնագործունեություն է: Պետք է լինի գաղափար, ծրագիր ու անձնակազմ, դա ավելի հեռանկարային կլիներ: Անձնական, քաղաքական կարիերայի տեսակետից դա հնարանք է Էդգար Ղազարյանի կողմից, նման «տրյուկներ» ինքը լավ է անում»:
Անդրադառնալով ԱԺ պատգամավորներ Հովիկ Աղազարյանի և Հակոբ Ասլանյանի Էդմոն Մարուքյանին վարչապետի թեկնածու ընտրելու մասին հայտարարությանը՝ Արշակյանը նշեց. «Էդմոն Մարուքյանն ի տարբերություն Էդգար Ղազարյանի ունի մեկ թերություն, որ ինքը «Քաղաքացիական պայմանագիր» կուսակցության նախկին զինակիցն է, հովանավորյալն է, ապահարզանը պետք է տա, թե չէ ստացվում է, որ երկու հոգի ՔՊ-ից ծրագիր են մշակել և հրավիրել են նախկին դաշնակցին, այս իմաստով երեքն էլ խնդիր ունեն: Նրանք ճիշտ ձևով չեն հեռացել «Քաղաքացիական պայմանագիր» կուսակցությունից, քաղաքական ծրագրով չեն հեռացել, կիսաքրեական կիսանեղացած ձևով են հեռացել, դա քաղաքական դիվիդենտ չի բերում, վարկանիշը չի բարձրացնում: Այդ թեկնածուին առաջարկելն իրենց կողմից սխալ էր»:
Թե ինչու խորհրդարանական ընդդիմությունը չի միանում նշված գործընթացներին՝ մեր զրուցակիցն ընդգծեց. «Անհաջողության հասնելու դեպքում սա խայտառակություն է, այսինքն՝ նշանակում է ուժերը ճիշտ չհաշվարկել, ճիշտ չգնահատել վիճակը և ձախողվել: Նման գործընթաց սկսողներին այդ ձախողվածի պիտակը սպառնում է»:
Այս ամենի համատեքստում Ազատ Արշակյանը խոսեց նաև Ռոբերտ Քոչարյանի մի քանի լրատվամիջոցի տված հարցազրույցի մասին. «ԱԺ-ում Գլխավոր դատախազի հայտնի հաշվետվությունը շատ մտահոգիչ է Ռոբերտ Քոչարյանի ընտանիքի համար, նրանք շտապ քայլեր են անում անվտանգությունն ապահովելու համար, այսինքն՝ դա ինքնապաշտպանության ակցիա է, ունեցվածքը փրկելու ակցիա: Քրեական հետապնդումը քաղաքականում է, ապագա իշխանության համար հայտ ներկայացրած անհատը դառնում է քաղաքական անհատ, ոչ թե քրեական: Նրա նարատիվը խիստ գործընկերային էր ՔՊ-ի համար, այսինքն՝ նա առաջարկում էր լինել երկրորդը: Նա ասում էր, որ շատ ավելի ցածր քաղաքական ապագա եմ խոստանում հայ ժողովրդին, այսինքն՝ դրանով ինքն առաջ է մղում «Քաղաքացիական պայմանագիր» ուժին: Ռոբերտ Քոչարյանն իրեն պահում է որպես ցածր մակարդակի կոլխոզնիկի պարտկոմ»:
Արշակյանի կարծիքով՝ Ռոբերտ Քոչարյանը Նիկոլ Փաշինյանին առաջարկում է համագործակցություն. «Երրորդ ուղերձն էլ Ռուսաստանին էր ուղղված, բայց այնտեղ էլ նրան չեն լսում, եթե լսեին՝ չէին վտարի: Ռուսների համար նա յուրային չէ, դասալիք է, ճիշտ այնպես, ինչպես Սերժ Սարգսյանը, նրանք երկուսն էլ Եվրոպայի հետ «սիրավեպ» են ունեցել: Ռուսաստանին ուղղված իր կոչը նույնպես ուղղված էր Նիկոլ Փաշինյանին, այսինքն ասում էր՝ համեմատության մեջ դու շահում ես: Ընդհանրապես դա խնդրանք էր Փաշինյանին, որ չարագացնի քրեական գործը»:
Արշակյանը նաև նշեց, որ ՀՀ ներքաղաքական դաշտում վերը նշված գործընթացներով այդ ուժերը պատրաստվում են 2026 թվականի ընտրություններին:
