Բաժանորդագրվեք Zarkerak.am-ի տելեգրամ ալիքին։
«Ներվային անհանգստությունները համատարած են, մարդիկ հոգեպես ճնշված են, բայց Իրանի ժողովրդի կամքն անկոտրուն է»,- Zarkerak.am-ի հետ զրույցում այս մասին ասաց թեհրանահայ Ռուբեն Շահբազյանսը՝ Իրանում ներկա վիճակը բնորոշելով որպես անհանգիստ և անորոշ:
Հիշեցնենք, որ hունիսի 13-ին Իսրայելը հարձակում է սկսել Իրանի ռազմական և միջուկային ենթակառուցվածքների վրա, ինչի հետևանքով վնասել են միջուկային օբյեկտներ, սպանելով բարձրաստիճան զինվորականներ, միջուկային գիտնականներ: Իրավիճակը շարունակում է լարված մնալ, Իրանը ևս պատասխան հարձակումներ է իրականացնում, փոխադարձ հարվածները շարունակվում են:
Նրա խոսքով՝ Թեհրանի, ինչպես նաև հարվածների թիրախ դարձած Թավրիզ և Սպահան քաղաքներում հայ համայնքում մարդկային կորուստներ, ինչպես նաև տուժածներ չկան.«Ոչ մի վնաս և ոչ մի դժբախտություն չի պատահել համայնքին: Հայ համայնքը Թեհրանում ունի իր տարբեր թաղերը, հատկապես երկու թաղերում հայերն ավելի խտացված են բնակվում, իհարկե մեր համայնքն էլ Իրանի ժողովրդի նման ունի իր մտահոգությունները: Երկիրը կարողանում է իր դիմադրությունը ցույց տալ, ժողովրդի մտահոգությունն այն է, որ այս պատերազմը երկարատև չշարունակվի»:
Նա նաև նշեց, որ հայկական որոշ դպրոցներ, իրավիճակով պայմանավորված, տարեվերջյան քննությունները հետաձգել են, իսկ եկեղեցիները շարունակում են իրենց բնականոն գործունեությունը, երեկ Թեհրանում նաև պատարագ է անցկացվել:
Ռուբեն Շահբազյանսն ընդգծեց, որ թեև խուճապ չի նկատում, բայց հատկապես այն ընտանիքները, որոնք ունեն տարեցներ և երեխաներ փորձում են վերջիններիս տեղափոխել առավել անվտանգ շրջաններ.«Մտահոգություններից ելնելով՝ տեղացիների շրջանում լինում են տեղաշարժեր կենտրոնական քաղաքներից դեպի գյուղաքաղաքներ: Տեղյակ եմ, որ հայ համայնքից ոմանք ցանկանում են տեղափոխվել Հայաստան, բայց հայերի շրջանում ևս խուճապի ականատես չեմ եղել»:
