Կապի օպերատորը կփոխհատուցի՞ վատ ինտերնետի համար. բաժանորդները կողջունեն, օպերատորները կբողոքեն. ո՞վ կշահի արդյունքում. մասնագետի դիտարկումները

Բաժանորդագրվեք Zarkerak.am-ի  տելեգրամ ալիքին։

«Սպառողների շահերից բխող նախագիծ է, բայց պետք է դեռ  հասկանալ՝ ինչպես են կյանքի կոչելու»,- Zarkerak.am -ի հետ զրույցում այս մասին ասաց մեդիափորձագետ Արթուր Պապյանը՝ անդրադառնալով  ՀԾԿՀ-ի կողմից հանրային քննարկման դրված որոշման նախագիծին, որով  առաջարկվում է ոչ որակյալ ինտերնետ ծառայությունների մատուցման դեպքում կապի օպերատորների կողմից  բաժանորդներին փոխհատուցում:

Նոր կարգավորմամբ սահմանվում է, որ օպերատորները պարտավոր են փոխհատուցում տրամադրել երկարատև ընդհատումների դեպքում(եթե ծառայությունների ընդհատման տևողությունը հաշվարկային ժամանակահատվածում գերազանցում է 24 ժամը) և ոչ որակյալ ծառայության դեպքում(եթե բաժանորդի դիմումի դեպքում օպերատորը ծառայությունների որակի ստուգման արդյունքում պարզում է, որ մատուցված ծառայությունը չի համապատասխանել պայմանագրով նախատեսված պայմաններին): Բաժանորդը պետք է ներկայացնի դիմում մինչև վճարման համար սահմանված ժամկետի ավարտը կամ մինչև հաշվարկային ժամանակաշրջանին հաջորդող ամսվա 15-ը: Մատուցված ծառայության՝ պայմանագրին չհամապատասխանելու մասին հիմնավոր տեղեկություններ ներկայացնելով:

Ինչ վերաբերում է փոխհատուցման չափին, ապա օպերատորը ծառայության մատուցման վճար չի գանձում առնվազն ծառայության ընդհատման կամ որակի անկման ժամանակահատվածի համար: Իսկ եթե վճարը գանձվել է նախապես, այն փոխհատուցվում է առնվազն նշված ժամանակահատվածի համար հաշվարկված գումարի չափով:

Թեև ՀԾԿՀ-ն նախատեսում է այս փոփոխությամբ  բարելավել նաև ինտերնետ հասանելիության ծառայությունների մատուցման որակական ցուցանիշները, բայց մեդիափորձագետի խոսքով խնդրին պետք է մոտենալ բազմակողմանի.«Մարդիկ ինտերնետին վերաբերում են որպես ծորակից հոսող ջուր,որը պետք է անպայման լինի:  Ինտերնետը շատ բարդ  ցանց է, դրա արագությունը կախված է  բազմաթիվ բաղադրիչներից, խնդիրը  կարող է լինել ոչ թե  օպերատորի պատճառով, այլ  ցանցում, սարքավորումներում, դժվար է  ապացուցել, թե կոնկրետ ինչից է խնդիրը: Օպերատորը կարող է տասնյակ պատճառներ բերել, օրինակ համակարգչում վիրուս կա, պրոցեսորը հզոր չէ, սարքերն անորակ են»: 

Ըստ մասնագետի կա նաև մի շատ խոցելի դետալ՝ կապի օպերատորները հաշվի առնելով ինտերնետի արագության  ու որակի հնարավոր խնդիրները պայմանագրերում  պարտավորվում են ապահովել մինչև X  չափով արագության ինտերնետ,  ու բողոքի դեպքում  այս մինչև բառը կլինի հօգուտ օպերատորի: 

Արթուր Պապյանի դիտարկմամբ կապի օպերատորն էլ չի ցանկանա տալ վատ ծառայություն՝ հաշվի առնելով ոլորտի մրցակցային լինելը: Սակայն նկատում է, շատ հաճախ ի տարբերություն ցերեկային ժամերի, երեկոյան կապը կտրուկ վատանում է.«Դա հիմնականում լինում է  մեծ ծավալի տրաֆիկի դեպքում: Նշանակում է, որ օպերատորները չեն ապահովում բավարար թողունակություն պիկ ժամերի համար, սա  իսկապես չափելի  խնդիր է: Պատճառն  այն է, որ ՀՀ-ում  ինտերնետի գները բավական էժան են և այդ գների մակարդակը պահելու համար օպերատորները փորձում են նվազագույն  ռեսուրսներ ներդնել,  որ կապի ինքնարժեքը  չթանկանա: Բողոքի դեպքում ասում են որ պետք է ներդնեն մեծ հզորություն, բայց դա կբարձրացնի գինը, քանի որ իրենց համար էլ թանկ արժե: Այդ պատճառով էլ նախընտրում են ներդնել մինիմալ հնարավորը, որ կարող են վաճառել օգուտ ստանալով»:   

Մեր զրուցակիցը չբացառեց, որ կապի օպերատորները կարող են ընդդիմանալ  նախագծին.«Կարող է  ասեն, եթե ուզում եք երաշխավորված արագություններ, մենք դա կվաճառենք 5 անգամ ավելի թանկ, կամ ավելի լավ կապի համար  ոչ թե շենքում պետք է կիսեք կապուղին, այլ ունենաք անհատական երաշխավորված: Նման կապուղիներ ունեն բիզնեսները, որը մոտ 10 անգամ ավելի թանկ արժե»:   

Պապյանը հիշեցրեց, որ ՀՀ-ն անցած տարիներին ինտերնետի հարցում անկախության մակարդակը զգալիրեն բարելավվել է, նաև խափանումներ հաճախակի չեն լինում.«Պետք է անել մաքսիմումը դիվերսիֆիկացված կապուղիներ ունենալու համար: Վերջին տարիներին այդ ուղղությամբ մի շարք քայլեր արվել են, ունենք այլընտրանքային կապեր՝ նաև Իրանով, եթե շարունակվեն հայ-թուրքական բանակցությունները,  այդ ուղղությամբ էլ ենթադրում եմ հավելյալ կապուղիներ կունենաք: Այսօր արդեն ՀՀ-ում ունենք Սթարլինք արբանյակային կապ, կան խոսակցություններ, որ հայտնվելու են ևս 2-3-ը»:  

Պապյանը նկատեց՝ դեռ պահպանվում է խնդիրը՝ Երևանում կապերը շատ ավելի լավ են քան մարզերում, պատճառը, ըստ նրա,  գնողունակությունն է, մարզերում նախընտրում են ավելի մատչելի կապ՝ որը ոչ միշտ է որակյալ.«Քանի դեռ մեր  երկրի ամբողջ տնտեսական ներուժը  կենտրոնացված է Երևանում, այդքան էլ իրատեսական չեմ համարում, որ չլինի տարբերություն մայրաքաղաքի ու մարզերի միջև»:  

Մարիամ Մկտչյան