Բաժանորդագրվեք Zarkerak.am-ի տելեգրամ ալիքին։
«Երեխաները կշարունակեն մնալ ՀՕՖ «Երեխաների պաշտպանության կենտրոն»-ում, որովհետև նոր բերում են ստաբիլ հոգեվիճակի, դեռ պետք է աշխատեն նրանց հետ, բայց իրավիճակը գնում է դեպի նորմալացման: Մայրը համաձայնություն է տվել, որ իր երեխաների հետ հոգեբույժ աշխատի»,- Zarkerak.am-ի հետ զրույցում այս մասին ասաց Գեղարքունիքի մարզպետարանի Առողջապահության և սոցիալական հարցերի վարչության գլխավոր մասնագետ Մամիկոն Գալոյանը՝ անդրադառնալով Ծափաթաղում հոր կողմից սպանված 3-ամյա Տիգրանի ընտանիքին:
Տիգրանի հոր՝ Արմեն Օվանեսովի վերաբերյալ քրեական վարույթին միացվել է նոր քրեական վարույթ՝ ծեծի վերաբերյալ։ Ըստ նոր մեղադրանքի հայրը դեպքի օրը տղաներից մեկին էլ է ֆիզիկական բռնության ենթարկել, նա դեմքի շրջանում վնասվածքներ է ունեցել։
Գալոյանը նշեց, որ եթե իրավապահ մարմինները երեխաների հետ հանդիպած լինեին, հավանաբար մարզպետարանն էլ տեղյակ կլիներ.«Համենային դեպս երեխաներին ինչ պրոցեսում էլ ներգրավվեն, պարտադիր պետք է լինի մասնագետի ներկայությամբ»:
Տիգրանի մոր հետ մարզպետարանի ներկայացուցիչները պարբերաբար հանդիպում են, նա տեղափոխվել է ամուսնու ընտանիքից, այլ գյուղում է ՝ հայրական տանը.«Մամայի հետ հոգեբան է աշխատում, հաճախակի է գնում երեխաներին տեսնում: Պարբերարար կրկնում է, որ ցանկանում է վերադարձնել երեխաներին, բայց ինքն էլ հասկանում է, որ իր վիճակն էլ երեխաներին վերադարձնելու համար լիարժեք նորմալ չէ: Ինքն էլ վերջնական պատկերացում չունի ապագայի առումով՝ որտեղ է ապրելու, ոնց: Պետք է հասկանա, կարող է օրինակ հետ վերադառնալ ու իր երեխաների Ծափաթաղում ապրել, թե ոչ: Մայրը դպրոց ուղարկել է, շատ հարցերում ուշադիր եղել է, բայց հարցեր էլ կան, որ տեղում չի եղել»:
«Եթե պատրաստ եղավ երեխաներին վերադարձնելու, խնդիր չկա, ինքը պահող մամա է, ուղղակի ծնողավարման և կենցաղավաման շատ ցածր մակարդակ ունի, այդքան բանը եթե կարողանա կազմակերպել, մի քիչ փոխվի, մենք երեխաներին կվերադարձնենք, բայց ընթացքը ցույց կտա »:
Արդյոք երեխաներին վերադարձը մոր մոտ կբացառվի, եթե պարզվի որ մայրը ևս տեղյակ է եղել հոր կողմից բռնություններից, բայց թաքցրել և լռել է, մեր զրուցակիցը նշեց, որ այս հարցում շատ խորը ուսումնասիրություն է պետք:
«Անհանգստություն ունեինք նաև Տիգրանի հորաքրոջ երեխաների մասով, տեղում ճշտեցինք, որ ամեն ինչ նորմալ է, խնդրահարույց բան չկար, երեխաները հագած-կապած էին, գնում էին դպրոց, երեխաների հետ էլ զրուցեցինք, ինչ-որ վտանգավոր բան չկար»,- ասաց մարզպետարանի պաշտոնյան:
Նա նշեց՝ անհիմն են խոսակցությունները, որ այս ընտանիքը գտնվել է սոցիալական ծանր վիճակում.«Ֆինանսական վիճակն այնպես չէ, որ վատ է եղել, ուղղակի կենցաղավարության, ծնողավարության խնդիրներ են եղել: Նորմալ տնտեսություն ունեն, անասուններ ունեն, մեծ այգի՝ բերքատու ծառերով, նպաստ էին ստանում, այնպես չէ, որ սոցիալապես խիստ անապահով էին, իրենք սոված չեն եղել»:
