Բաժանորդագրվեք Zarkerak.am-ի տելեգրամ ալիքին։
Հայաստանում հայրենասիրությունը ձևավորվել է որպես ֆորպոստ` Ստալինի ամբիցիաները բավարարելու համար։ Այս մասին նա Restart հիմնադրամի MaskOFF պանելային քննարկման ժամանակ հայտարարել է ՀՀ վարչապետ Նիկոլ Փաշինյանը:
Ըստ նրա՝ Հայաստանում հայրենասիրության մոդելը, որով մարդիկ մինչև «իրական Հայաստանի» գաղափարախոսությունը սիրել են հայրենիքը, մի գործնական նշանակություն է ունեցել` 2-րդ աշխարհամարտից հետո ապահովել ստալինյան ամբողջատիրական ամբիցիաները։
«Մեր հայրենասիրության մոդելի հետ մենք խնդիր ունենք, որովհետև մեր հայրենասիրության մոդելը ներդրված է 1940–ական, 50-ական, 60-ական թվականներին։ Հայրենասիրության էդ մոդելը գիտե՞ք` ինչից է ծնվել։ 2-րդ աշխարհամարտի ժամանակ Միացյալ Նահանգները, Մեծ Բրիտանիան, Խորհրդային Միությունը դաշնակիցներ էին, աշխարհամարտի ավարտից հետո սկսվեց ճամբարների բաժանումը, և Թուրքիան հայտնվեց արևմտյան, ՆԱՏՕ–ական ճամբարում։ Ստալինը բավարարված չէր, ինքը համարում էր, որ այնքան է հաղթել, որ ավելի մեծ ազդեցության և տարածքների ամբիցիա ունի»,-ասել է վարչապետը։
Նա նաև նշել է, որ Հայաստանում հայրենասիրությունը ձևավորվել է 1950–60–ական թվականներին նկարահանված ֆիլմերի, ստեղծագործությունների հիման վրա։
Փաշինյանի խոսքով՝ չնայած այդ ստեղծագործությունները մեծ գեղարվեստական արժեք ունեն և հայ ժողովրդի ինքնության ու գիտակցության մի մասն են, բայց պետք է հասկանալ այդ գիտակցության մասերի պատճառահետևանքային կապը։
Վարչապետը նաև հավելել է, որ իր խնդիրն է, որ Հայաստանի Հանրապետությունն իր միջազգայնորեն ճանաչված տարածքում ապրելու և գոյություն ունենալու համար արտաքին աջակցության կարիք չունենա։ Այս պատճառով պետք է հարևանների հետ հարաբերությունները կարգավորել։
