Բաժանորդագրվեք Zarkerak.am-ի տելեգրամ ալիքին։
«Քաղաքապետարանի հանրակրթության վարչության աշխատակիցները ինչպես միշտ վերջին շրջանում ևս դպրոցներում իրականացրել են այցեր: Տեղյակ ենք, որ դպրոցներում նման միջոցառում ևս կազմակերպվել է, բայց այցերի ժամանակ որևէ ծնողի, դպրոցին աշխատակիցների հետ այդ թեմայով որևէ խոսակցություն տեղի չի ունեցել»,- Zarkerak.am-ի հետ զրույցում այս մասին ասաց Երևանի քաղաքապետարանի հանրակրթության վարչության պետ Մարգարիտ Խաչատրյանը՝ անդրադառնալով համացանցում տարածված և մամուլում հայտնված տեղեկություններին, որ Երևանի քաղաքապետարանի տարբեր աշխատակիցներ այս օրերին այցելում են Երևանի տարբեր դպրոցներ, քանի որ ծնողներից ահազանգեր են ստացել, թե դպրոցներում ստիպում են «Secret Santa» խաղալ: Նշվում էր, թե դպրոցի դահլիճներում՝ առանց դպրոցի տնօրենների և ուսուցիչների ներկայության, քաղաքապետարանի աշխատակիցները զրույցներ են ունենում ծնողկոմիտեների հետ՝ տեղեկանալու իրավիճակի մասին։
«Ժամանակի սղության պատճառով հաշվի առնելով, որ տարեվերջ է, մեր մշտադիտարկման շրջանակում համաժամանակյա և համակարգված մի քանի դպրոց ենք այցելել վերջին օրերին: Չեմ կարող ասել՝ որն է նպատակը մեր պարտադիր այցելությունները այս թեմայի հետ կապելու: Ենթադրում եմ, որ գուցե այցերից մեկի ժամանակ ինչ-որ խոսկացության ժամանակ գեներացվել է այդ թեման, բայց կրկնում եմ՝ որևէ քննարկում չի եղել և այցերը բողոքներով պայմանավորված չեն եղել»,- նշեց Խաչատրյանը:
Ասաց, որ «Secret Santa» խաղալը դպրոցներում չեն կարող արգելել, քանի որ կամավորության սկզբունքով իրականացվող միջոցառում է.«Նորմալ երևույթ է, բայց շատ կարևոր է, որ հավասարության և արդարության մթնոլորտն ապահովվի, սովորողի կամ ծնողի համար պարտադրանք չլինի մասնակցելը: Բայց պետք է և դպրոցներին և ծնողներին հիշեցնել, որ ինչպես մյուս, այնպես էլ այս միջոցառումը պետք է իրականացնել չափի և բովանդակության ճիշտ սահմաններում»:
Խաչատրյանը սակայն չբացառեց, որ հնարավոր է որոշ ծնողներից դժգոհություններ լինեն.«Տարաբնույթ բողոքներ, զանգեր լինում են, գուցե զանգերից մեկը կամ մի քանիսը դրան վերաբերել են, գուցե առանձին դեպքեր լինեն, որոնց առանձին անդրադարձ է կատարվի, դրանց անձամբ չեմ տիրապետում»:
