Բաժանորդագրվեք Zarkerak.am-ի տելեգրամ ալիքին։
ՀՀ վարչապետի տիկին Աննա Հակոբյանի կողմից սկսվել է լայնամասշտաբ արշավ ընտանեկան բռնության դեմ, որի նպատակն է կանխարգելել բռնությունն ընտանիքում՝ թույլ չտալով դրա տեղի ունենալը, ապահովել արդյունավետ քննություն և ձևավորել զրո հանդուրժողականություն բռնության նկատմամբ։
Այդ մասին Կառավարության՝ օգոստոսի 3-ի նիստում ասաց ՆԳ նախարար Արփինե Սարգսյանը՝ տեղեկացնելով, որ արշավի շրջանակում մշակվել է օրենսդրական նախագծերի փաթեթ։ Դրա հեղինակներն են ԱԺ «Քաղաքացիական պայմանագիր» խմբակցության պատգամավորներ Զարուհի Բաթոյանը, Սոնա Ղազարյանը և Ծովինար Վարդանյանը։
Փաթեթով առաջարկվող փոփոխությունների առաջին ուղղությունը վերաբերում է Քրեական օրենսգրքի մակարդակում ընտանեկան և կենցաղային բռնությունից պաշտպանության ուժեղացմանը։
«Ընտանեկան և կենցաղային բռնությունը ճանաչվում է որպես առանձին երևույթ։ Այս ուղղությամբ հարաբերությունները Քրեական օրենսգրքում դիտարկվում են որպես առանձին հոգածության առարկա և առանձին գլուխներով նախատեսվում են որպես ինքնուրույն հանցակազմեր։ Նաև խստացվում է դրանց համար պատասխանատվությունը»,- ասաց նախարարը։
Երկրորդ ուղղությունը վերաբերում է քրեական վարույթի շրջանակում տուժողի պաշտպանության ուժեղացմանը։ Գործող օրենքով բեռը դրվում է բռնության զոհի վրա, և նա պետք է ներկայացնի հաղորդում։
«Նախագծով հեղինակներն առաջարկում են այս դեպքում չկապել գործընթացը տուժողի բողոքի կամ հաղորդման հետ և բոլոր դեպքերը դարձնել հանրային մեղադրանքի առարկա, այսինքն՝ բոլոր դեպքերում պետությունն արձագանքելու է, սկսվելու է քրեական վարույթ, և պատշաճ կերպով գնալու ենք հետագա ընթացքով։ Կարևոր է, որ բացառում ենք գործընթացի ընթացքում հաշտության գործընթացը, որովհետև լինում է, որ համոզելով անձինք հետ են վերցնում հաղորդումները։ Այս դեպքում պետությունը գնալու է մինչև վերջ և պատասխանատվության է ենթարկելու բռնարարին»,- ասաց նա՝ հավելելով, որ նախատեսվում է սահմանափակել նաև տուժողի կրկնակի հարցաքննությունը և արգելել տնային կալանքը այն դեպքում, երբ տուժողն ու մեղադրյալը շարունակում են բնակվել նույն տանը։
Երրորդ ուղղությունը վերաբերում է պաշտպանության միջոցներին։ Նախազգուշացումը՝ որպես պաշտպանության ինստիտուտ, կվերացվի, քանի որ այն արդյունավետ չէ։ Նախազգուշացումից հետո, որպես կանոն, կրկնակի բռնության դեպքեր են արձանագրվում։
Բռնության դեպքում, որպես կանոն, պաշտպանության է վերցվում բռնության զոհը և տեղափոխվում անվտանգ միջավայր, սակայն նոր փաթեթով առաջարկվում է, որ բռնություն կատարողն է դուրս բերվում ընդհանուր միջավայրից՝ ապահովելով զոհի անվտանգությունը։ Նաև պարտադիր պայման է դառնում, որ բռնության վայր ժամանած ոստիկանն ունենա կրծքին ամրացված տեսախցիկ։
Չորրորդ փոփոխությունը, ըստ նախարարի, վերաբերում է պատժի ձևին, որի շրջանակում նախատեսվում է բռնարարի համար զուգահեռ ռեաբիլիտացիայի կազմակերպում։
