Բաժանորդագրվեք Zarkerak.am-ի տելեգրամ ալիքին։
«Այսօր խաղաղությունը կայուն չէ, թեև անցած օրերի համեմատ իրավիճակն ավելի հանգիստ է: Բանակը, ճիշտ է, վերցրել է, քրդաբնակ երկու շրջանները, բայց դեռ պարզ չէ՝ ինչ կարող է լինել մի քանի օր հետո»,- այս մասին ասաց Zarkerak.am-ի սիրիահայ աղբյուրը:
Կառավարական ուժերի դեմ մի քանի օր տևած մարտերից հետո Սիրիայի քուրդ զինյալները հայտարարել են, որ հրադադարի համաձայնության շրջանակում համաձայնել են դուրս գալ Հալեպից: Սիրիայի զինված ուժերն էլ հայտարարել են, որ քրդերի կողմից վերահսկվող Շեյխ Մաքսուդ թաղամասում ավարտել են գործողությունները:
Նա նշեց, որ տեղի 8-9 հազարանոց հայ համայնքում խուճապի և անորոշության մթնոլորտը դեռ պահպանվում է.«Կան ռմբակոծությունից վնասված բնակարաններ, ավտոմեքենաներ, բայց զոհեր, տուժածներ չունենք: Մարդիկ հիմա ամեն ինչից զգույշ են, բայց փորձում են աստիճանաբար բացել խանութները, դպրոցները, այլ հաստատություններ, ժողովուրդն էլ է այն հույսով, որ իրավիճակը կլավանա»:
Մեր աղբյուրը նշեց, որ անկախ Հալեպում ստեղծված ծանր իրավիճակից՝ չի լսել խոսակցություններ, որ հայերը տարհանվելու ցանկություն հայտնեն, ըստ նրա՝ իրատեսական էլ չէ այդ թեման բարձրաձայնելը.«Ասենք եկան, որտե՞ղ են տեղավորվելու: Որ գան էլ, գումարով չեն գալու, ինչպես են ապրելու, արդեն ով որ փող ունի, դուրս է եկել Սիրիայից: Նրանք, ովքեր մնացել են, տուն-տեղ ունեն, գործ ունեն, խանութ ունեն: Հայ համայնքը չի մեռել, ողջ է, մեկը մեկին օգնության ձեռք մեկնում են: Տեղում գործում են եկեղեցին, հայկական կուսակցություններ, միություններ, բոլորը մարդկանց հոգատար նայում են»:
Մեր աղբյուրը նշեց, որ քրդաբնակ շրջաններում մնում են քրդական մի քանի փոքր խմբավորումներ, կրակոցները դեռ շարունակվում են, բանակի նպատակը քրդերին հեռացնելն է դեպի երկրի՝ Թուրքիայի հետ սահման:
