Դեկտեմբերի 24-ին Կամիր խաչի միջազգային կոմիտեի միջնորդությամբ շրջափակված Արցախի «Արևիկ» բուժմիավորման վերակենդանացման բաժանմունքում գտնվող 4-ամսական փոքրիկը տեղափոխվեց Երևանի «Մուրացան» հիվանդանոցային համալիրի մանկական և նորածնային վերակենդանացման կլինիկա։ ԱՀ Առողջապահության նախարարությունը լեշմանիոզ հիվանդությունն ունեցող այս փոքրիկի մասին պարբերաբար տեղեկություններ էր հրապարակում՝ նշելով, որ նրան Երևան տեղափոխելը անհրաժեշտություն է։
Zakerak.am-ը կապ հաստատեց ՀՀ Առողջապահության նախարարության հետ՝ արցախցի փոքրիկի առողջական վիճակի վերաբերյալ հավելյալ տեղեկատվություն ստանալու նպատակով․ «Երեխայի առողջական վիճակում թեթև դրական տեղաշարժ կա այն առումով, որ արդեն մի քիչ աշխուժացել է և սկսել է սնվել։ Բայց շարունակում է դեռ բարձր ջերմել, որը բնորոշ է այս հիվանդությանը»։
ԱՆ մամուլի խոսնակը վստահեցրեց, որ մասնագետներն անում են հնարավոր ամեն բան, որ կայուն ծանր վիճակում գտնվող փոքրիկը սկսի աստիճանաբար ապաքինվել։
Հետաքրքրվեցինք նաև դեկտեմբերի 19-ին սրտային պաթոլոգիայով Երևան տեղափոխված արցախցի 62-ամյա տղամարդու առողջական վիճակով՝ ի՞նչ տեղաշարժ կա՝ աորտոկորոնար շունտավորումն ավարտելուց հետո։ Նախարարության մամուլի խոսնակը նշեց, որ հանգստյան օրերի տվյալներով՝ արվել են բոլոր անհրաժեշտ միջամտությունները, հիվանդը գտնվում է վերակենդանացման բաժանմունքում։
