Բաժանորդագրվեք Zarkerak.am-ի տելեգրամ ալիքին։
Ունենք նվազագույն աշխատավարձի թիվ, որը մեր երազած նվազագույն աշխատավարձից հեռու է, բայց նաև պետք է հասկանանք, որ նվազագույն աշխատավարձի բարձրացումն ունի նաև այլ հետևանքներ, այդ թվում՝ ֆիսկալ: Նվազագույն աշխատավարձի բարձրացումն ունի նաև տնտեսության վրա ազդեցություն, որը միշտ չէ, որ դրական է: Այդ մասին Ազգային ժողով-Կառավարություն հարցուպատասխանի ժամանակ ասաց ԱՍՀ նախարար Արսեն Թորոսյանը՝ անդրադառնալով «Հայաստան» խմբակցության պատգամավոր Թադևոս Ավետիսյանի՝ նվազագույն աշխատավարձի մասին դիտարկմանը, թե այն չի բարձրանալու, մնալու է 75 հազար դրամ, և որ այն մոտ 70 հազար դրամով ավելի ցածր է, քան այս տարվա կեսին գրանցված՝ 1 անձի համար անհրաժեշտ գոյատևման նվազագույն ծախսը:
Ի պատասխան նախարարը կարծիք հայտնեց, թե աղքատությունը նվազել է, աղքատների թիվը կրճատվել է: Ազգային վիճակագրական ծառայության տվյալները ցույց են տալիս, որ այսօր քիչ է այն մարդկանց թիվը, որոնք նվազագույն աշխատավարձի և պարենային զամբյուղի տարբերությունների հետ կապված խնդիր ունեն:
«Բայց նաև տեսնում ենք, որ մեր միջին աշխատավարձն աճում է, այսինքն՝ մեր քաղաքացիների եկամուտներն աճում են, նաև աղքատությունն է նվազում՝ ըստ վերջին վիճակագրական տվյալների, որոնք, վստահ եմ, 2025-ին ավելի լավն են լինելու, քան 2024 թվականին էր,- ասաց նա և հավելեց.- Ինչպես վարչապետը նշեց բյուջեի քննարկման մասին այսօրվա ելույթում, մենք մոտ ենք ծայրահեղ աղքատությունը վերացնելուն, որ ընդհանրապես այն չլինի: Հուսով ենք՝ կհասնենք մոտ ապագայում:
Հետևաբար մեր քաղաքականությունները տալիս են իրենց արդյունքները՝ անկախ նրանից, որ մեր նվազագույն աշխատավարձի թիվը 75 հազար դրամ է»,- ասաց նա:
