Բաժանորդագրվեք Zarkerak.am-ի տելեգրամ ալիքին։
«Ուզում եմ ևս մեկ անգամ բոլորիս շնորհավորել ընտրությունների առիթով: Մեր հիմնական անելիքը, ինչպես նախընտրական շրջանում առիթ ունեցել եմ ասելու՝ նոր որակի պետություն ստեղծելու մեր առաքելության շարունակությունն է և պետության վերելքն այն տրամաբանությամբ, որ պետությունը մարդու անվտանգությունը, բարեկեցությունը, ազատությունն ապահովելու միջոց է»,-Կառավարության նիստում ասաց վարչապետ Նիկոլ Փաշինյանը:
Փաշինյանի խոսքով՝ կսկսեն Կառավարության ծրագրի նախագծի մշակումները, որը նոր Կառավարության ձևավորումից հետո պիտի հաստատվի ԱԺ-ում. «Այս ընթացքում կփորձենք ոչ ֆորմալ քննարկումներ ունենալ Կառավարության և ապագա Կառավարության անդամների կամ ավելի լայն շրջանակի հետ, որպեսզի նախորդող շրջանի աշխատանքների վերլուծություն իրականացնենք և պլանավորենք: Լավ լուրն այն է, որ նախկին երկու դեպքերում այսքան շատ ժամանակ չենք ունեցել՝ ո՛չ Կառավարության կազմի, ո՛չ ծրագրի և այլ փաստաթղթերի մասին մտածելու, որովհետև նախորդ երկուսը եղել են արտահերթ ընտրություններ, այս անգամ ավելի հանդարտ ռեժիմով կաշխատենք»:
Փաշինյանը նշեց, որ նոր գաղափար է առաջարկել՝ առաջիկա ծրագրում ունենալ առաջնահերթությունների հստակ ցանկ. «Պատմության մեջ չի եղել և չի էլ լինելու այնպիսի ծրագիր, որ 100 տոկոսով իրականացվում է: Կարևոր է, որ մենք ունենանք առաջնահերթություններ, որպեսզի ամենօրյա աշխատանքով հարցերի հնարավորինս սեղմ շրջանակի վրա կարողանանք կենտրոնացած մնալ: Այո, նոր փուլ է գալիս, բայց դրա ամենակարևոր առանձնահատկությունն այն է, որ սա աշխատանքի շարունակությունն է, որը պետք է դարձնենք ավելի արդյունավետ»:
