Բաժանորդագրվեք Zarkerak.am-ի տելեգրամ ալիքին։
Կասպից ծովում որոնողական գործողությունն ավարտվել է, գտնվել են զոհված բոլոր 14 ղազախստանցի զինծառայողները։ Այս մասին հայտարարել է Պաշտպանության նախարարության մամուլի ծառայությունը։
Համաձայն հաղորդագրության՝ տեղական ժամանակով ժամը 09:15-ին (Երևանի ժամանակով 08:15-ին) անընդհատ որոնողական-փրկարարական աշխատանքների ընթացքում հայտնաբերվել են նախկինում անհետ կորած երկու զինծառայողների՝ սերժանտ Մանսուր Գումարովի և նավաստի Միրաս Տուրդիբեկուլուի մարմինները։
Ղազախստանի Պաշտպանության նախարարության և Զինված ուժերի ղեկավարությունն ու անձնակազմը խորին և անկեղծ ցավակցություն են հայտնել զոհված զինծառայողների հարազատներին ու մտերիմներին։ Մամուլի ծառայությունում ընդգծել են, որ զոհվածների ընտանիքներին կցուցաբերվի համակողմանի աջակցություն, ներառյալ՝ նյութական և հոգեբանական օգնություն։
Փաստի առթիվ հարուցվել է քրեական գործ, հատուկ հանձնաժողովի կողմից անցկացվում են քննչական միջոցառումներ՝ տեղի ունեցածի բոլոր պատճառներն ու հանգամանքները պարզելու համար։ Ինչպես ավելի վաղ հայտնել էին Ղազախստանի գլխավոր դատախազությունում, պարզվել են պաշտոնատար անձինք, որոնք կասկածվում են ծառայության նկատմամբ անփույթ վերաբերմունքի և եղանակային պայմանները հաշվի առնելով անձնակազմի անվտանգությունը չապահովելու, փրկարարական աշխատանքները ոչ պատշաճ կազմակերպելու մեջ, ինչը հանգեցրել է մարդկային զոհերի։
Հիշեցնենք, որ սեպտեմբերի 24-ին Մանգիստաուի մարզում Կասպից ծովի ափին Ռազմածովային ուժերի զորավարժությունների անցկացման ժամանակ եղանակի կտրուկ վատթարացման և պոռթկուն քամու պատճառով բաց ծով էր քշվել 17 զինծառայող։ Նրանցից 14-ը զոհվել են։ Օպերատիվորեն ձեռնարկված միջոցառումների արդյունքում երեքը փրկվել են։
