Բաժանորդագրվեք Zarkerak.am-ի տելեգրամ ալիքին։
Ապրանքների գները այժմ կէժանանա, սակայն դա երկար չի տևի՝ կախված պետության աջակցության ինտենսիվությունից: Այս մասին Zarkerak.am-ի հետ զրույցում ասաց տնտեսագետ Գագիկ Մակարյանը անդրադառնալով Ռուսաստանի կողմից ապրանքների սահմանափակմանը:
Հիշեցնենք, որ «Ռոսսելխոզնադզոր»-ը (Ռուսաստանի անասնաբուժական և բուսասանիտարական հսկողության դաշնային ծառայությունը) 2026 թվականի հունիսի 3-ից սահմանափակումներ է կիրառել Հայաստանից և հայկական ծագում ունեցող հնդավոր պտուղների, սմբուկի, կարտոֆիլի և չրերի ներմուծման, ինչպես նաև ԵԱՏՄ երկրներ այս արտադրանքի տարանցման վրա։ Այս մասին նշված է «Ռոսսելխոզնադզոր»-ի մամուլի ծառայության տարածած հաղորդագրության մեջ։
«Գյուղմթերքների և տարբեր ապրանքների գծով Ռուսաստանը մեր երկրի հիմնական առևտրային գործընկերն է և մեր երկիրը արտահանման 92-98 տոկոսի սահմանաններում բավարարված էր Ռուսաստանի հետ առևտրով: Ապրանքների մեծ մասը բանջարեղեններ, մրգերն են, ինչպես նաև ծաղիկներ և որոշակի կաթնամթերք և բավականին մեծ մասը ալկոհոլային խմիչքներ՝ հատկապես կոնյակ և գինիներ»,- նշեց տնտեսագետը:
Ըստ նրա՝ եթե ապրանքները չեն արտահանվում բնական է դրանք մնում են արտադրողի վրա և կոպիտ ասած արտադրողը պետք է լուծումներ գտնի․ օրինակ՝ պետք է արագ գտնի այլ շուկաներ, սակայն հաշվի առնելով, որ ֆերմերների մեծ մասը չունեն այդ մարքեթինգային գիտելիքները, ժամանակը, հնարավորությունները:
«Այստեղ պետք է ձեռք մեկնի պետությունը: Օրինակ՝ պետությունը կարող է պահածոյագործական գործարաններին տրամադրել սուբսիդավորված վարկեր կամ տրամադրել փոխառություններ՝ էժան տոկոսով, որպեսզի նրանք շատ արագ այն մթերքները որոնք, որ հնարավոր է պահածոյի վերածել, գնեն գյուղացիներից: Իսկ ծաղիկների դեպքում, դրանք կարող է գնել պետությունը և վաճառել ծաղկի խանութներին»,- ասաց նա:
Գագիկ Մակարյանը նշեց, որ այժմ գյուղացիները կամ ֆերմերները կառչելով փրփուրներից, բնականաբար պետք է ապրանքը վաճառեն ներքին շուկայում և ինչքան հնարավոր է էժան գնով: Նրա խոսքով՝ այժմ շատ ֆերմերային տնտեսություններ կարող են իրենց եկամտաբերությունը կորցնել, որի հետևանքով հնարավոր է նաև սնանկանալ կամ ընկնեն վարկերի, տոկոսների տակ և այս ամենից ելնելով պետության հաջորդ քայլը ուշադրություն սևեռելն է, որպեսզի չսնանկանան այդ ֆերմերային տնտեսությունները․ այսինքն բանկերի հետ փորձեն բանակցել՝ օրինակ տոկոսադրույքները կանգնեցնեն կամ էլ պետությունը վարկերի տոկոսադրույքները վճարի:
«Լուծումներից մեկն էլ այն է, որ պետությունը դիմի Եվրոպական շուկա քվոտաներ տրամադրելու համար»,- ասաց նա: Գագիկ Մակարյանը նաև նկատեց, որ շատ դեպքերում խոսվում է արևմուտք նաև եվրոպա ապրանքները արտահանելու մասին։
«Մեր շրջակա երկրների մեծ մասը մահմեդական երկրներ են հատկապես արաբական աշխարհը, իսկ մահմեդական երկրներ ապրանքներ վաճառելու համար պետք է ունենանք Հալալ սերտիֆիկատ։ Կարծում եմ, որ Ռուսաստանը սահմանափակումները կշարունակի նաև ընտրություններից հետո, որովհետև եթե դրանք պայմանավորված են ապրանքների որակով, ապա դրանց որակը ընտրություններից հետո կտրուկ չի լավանալու, իսկ եթե քաղաքական է ևս կարող է այդ նույն քաղաքականությունը շարունակել որոշակի կախվածություն ստեղծելով իրենց»,-հավելեց տնտեսագետը:
