Բաժանորդագրվեք Zarkerak.am-ի տելեգրամ ալիքին։
«Նախընտրական քարոզարշավի մասին դուք մի խոսեք, որովհետև երբ խոսում եք դրա մասին, ակամայից աչքերիս առաջ է գալիս ձեր դաշինքի կողմից պատրաստված այն հոլովակը, որտեղ Ծիծեռնակաբերդը մզկիթ է դառնում, իմ ընկեր Երևանի քաղաքապետ Տիգրան Ավինյանին խնդրում և հորդորում եմ՝ եթե հանկարծ նմանատիպ շինթույլտվության դիմում ստանա «Հայաստան» դաշինքից, որ օրինակ՝ Ծիծեռնակաբերդի փոխարեն մզկիթ կառուցեն, անպայման մերժի»,-ԱԺ նիստում դիմելով «Հայաստան» դաշինքի պատգամավոր Քրիստինե Վարդանյանին՝ ասաց ԱԺ փոխնախագահ Վահագն Ալեքսանյանը:
Ալեքսանյանի խոսքով՝ «Հայաստան» դաշինքն աչքի է ընկնում նախընտրական ֆանտաստիկ հոլովակներով. «Նախորդ ընտրություններին էլ ձեր նախընտրական հոլովակներում ցուցադրում էիք բայրաքթարներից հայ զինվորների սպանության կադրերը, ես չեմ պատկերացնում՝ մարդ ինչ պետք է զգա, որ ուզենա այդ կադրերը ցուցադրի: Ես էլ այն կարծիքին եմ, որ դա եղել է ձեր նախընտրական խոստումը և դուք դա չեք կատարելու, այդ շինթույլտվության համար, որ դիմեք՝ մերժվելու եք: Անկեղծորեն կարծում եմ, որ Ագնեսա Խամոյանից հետո երկրորդ լավագույն քաղաքական միտքը ձեր խմբակցությունում ձերն է: Տիկին Վարդանյանն ունի շատ ճկուն և օպերատիվ միտք, շատ լավ կարողանում է ճիշտ պահին բերել այն փաստարկները, որոնք իրենք ունեն, եթե տիկին Վարդանյանն իր կարողություններով վերցնի ավելի ճիշտ գաղափարախոսություն և ավելի ճիշտ փաստարկներ, նա կլինի շատ ավելի ֆանտաստիկ քաղաքական գործիչ: Դաշնակցականի դրախտը նա է, որ ինքը կարող է ուղղակի առանց որևէ պատասխանատվության դրոշակը բարձրացնի, որ էս մի բանը մերն է, էն մի բանը մերն է, էլ ավել բան պետք չի»:
Ալեքսանյանը նաև նշեց. «Ասում եք՝ դե ասեք, ՌԴ-ն սպառնալիք է, թե՝ ոչ: Ռուսաստանն Ադրբեջանին 5 միլիարդի զենք է վաճառել, Դաշնակցությունն այդ ընթացքում այստեղ խմբակցություն է ունեցել, բա ասեիք՝ դա սպառնալիք է, թե՝ ոչ, 5 միլիարդի զենքի վաճառքը սպառնալի՞ք է, թե՞ ոչ, ինձ համար ակնհայտ է, որ սպառնալիք է, ասեմ՝ ոնց եք դիմագրավել այդ սպառնալիքին՝ ձեր և Հանրապետական խմբակցության գործընկերներն ասել են՝ դա բիզնես է»:
