Բաժանորդագրվեք Zarkerak.am-ի տելեգրամ ալիքին։
«Ես չեմ զարմանում նման մեկնաբանություններից»,- լրագրողների հետ զրույցում այս մասին ասաց վարչապետ Նիկոլ Փաշինյանը՝ անդրադառնալով հարցին, թե տեղյակ է շրջանառավող խոսակցություններին, որ ՀՀ կաթողիկոսի ընտրության հարցում որոշողը Թուրքիայի ղեկավարն է: Վարչապետը բացատրեց չզարմանալու պատճառը.«Դարեր ի վեր Թուրքիայի ղեկավարն է որոշել, թե ով պետք է լինի Ամենայն Հայոց Կաթողիկոսը, որոշ դարեր ի վեր Պարսկաստանի, Ռուսաստանի ղեկավարը: Դա հոլովում են այն մարդիկ, որ այդ կուլտուրայի մեջ են և այն որ ՀՀ-ն ասում է, որ մեր եկեղեցին պետք է ի վերջո նոր Կանոնագիրք ունենա, դրանով էլ դիմադրություն կա, դա էլ եմ հասկանում, մինչև հիմա վերջին այդպիսի փատաթղթերն ընդունվել են ռուսական կամ թուրքական կայսրության ֆորմատով»:
Նա նշեց, նման մտածելակերպով մարդկանց տարօրինակ է թվում, երբ ՀՀ վարչապետը խոսում է հոգևոր դաշտի խնդիրներից, բայց տարօրինակ չի թվում, որ Թուրքիայի սուլթանի, Ռուսաստանի ցարի ընդունված շատ կանոնակարգումներ մինչև այսօր դե յուրե գործում են.«Ծայրագավառային տրամաբանությունը զարգանում է և հանգում է շատ տրամաբանական ենթադրության, քանի որ խոսվում է մի հարց, որը դարերի ավանդույթով Թուրքիայի ղեկավարի իրավասության հարցն է, հետևաբար եթե ՀՀ ղեկավարը տենց թեմաներ արծարծում է, ուրեմն լիազորություն է ստացել Թուրքիայի ղեկավարից, կամ ուրիշ տարբերակով Ռուսաստանի, Պարսակաստանի, հենց դրա հետ է մեր խնդիրը»:
«Մեր ենթագիտակցությունը սեփական պետության ընկալումը դեռ չունի, որովհետև հարյուրամյակներով մեզ համար պետությունն ուրիշ բան է եղել, հայրենիքն ուրիշ բան, որովհետև հայրենիքը Հայաստանն է եղել, պետությունը Պարսկաստանը, Օսմանյան կայսրությունը, ռուսական կայսրությունը: 500 տարի շարունակ մեզ համար հայրենիքն ուրիշ բան է եղել, պետությունը՝ ուրիշ, հայրենիքը սիրելի, պետությունը՝ ոչ այնքան սիրելի, այդ ենթագիտակցությունը շարունակումն է շատ բաներ շարժել ՀՀ-ում»,- նշեց վարչապետն ու հավելեց, որ այս կիրակի պատարագի պատրաստվում է մասնակցել Գառնիի Սուրբ Աստվածածին եկեղեցում:
