Բաժանորդագրվեք Zarkerak.am-ի տելեգրամ ալիքին։
Հայաստանին մի կողմից հարևան է ԻԻՀ-ն, որը նավթի և գազի պաշարների տեսանկյունից երրորդ երկիրն է աշխարհում, իսկ վերևում Ռուսաստանն է, որը ևս այս ոլորտում ազդեցիկ երկրներից մեկն է: Կարծում եմ, որ այս ամբողջ ներուժը հնարավորություն է տալիս, միմյանց փոխլրացնելով, Հայաստանը վերածել էներգետիկ ոլորտում տրանզիտի յուրահատուկ օղակի: Այդ մասին ասուլիսի ժամանակ ասաց Հայաստանում Իրանի դեսպան Խալիլ Շիրղոլամին՝ անդրադառնալով ՀՀ-ում նոր ատոմակայան կառուցելու մասին քննարկումներին:
Այս համատեքստում լրագրողը հետաքրքրվեց՝ Իրանը՝ որպես ՀՀ կարևոր էներգետիկ գործընկեր, ո՞ր ճանապարհն է Հայաստանի համար ավելի շահավետ համարում՝ տարածաշրջանային համագործակցությո՞ւնը, թե՞ արտատարածաշրջանային տեխնոլոգիական ազդեցության կախվածության խորացումը:
Դեսպանը հիշեցրեց, որ էներգետիկայի ոլորտում ՀՀ-ի և ԻԻՀ-ի միջև տարբեր քննարկումներ են ընթանում, և որ այդ քննարկումները ու գաղափարներն առնչվում են թե՛ գազի, թե՛ էներգետիկ ոլորտներին, թե՛ տեղափոխմանը, թե՛ տրանզիտին, ինչպես նաև նավթամթերքի ոլորտում համագործակցության հարցերին:
«Նոր գաղափարներ և նոր պլաններ կան, և եթե երկու կողմերն անհրաժեշտ ու իրական կամք դրսևորեն, ապա կարծում եմ, որ էներգակիրների տրանզիտի և հենց Հայաստանի էներգետիկ պոտենցիալի խորացման ուղղությամբ Հայաստանը կարող է լրիվ նոր դիրքում հայտնվել»,- ասաց դեսպանը:
