Բաժանորդագրվեք Zarkerak.am-ի տելեգրամ ալիքին։
Երևանում քաղաքաշինական ծրագրերն իրականացվում են ընդունված գլխավոր հատակագծի և համապատասխան գոտևորման նախագծերի հիման վրա, իսկ շինարարության հնարավորությունը վերջնականապես գնահատում է ճարտարապետական խորհուրդը։
Այս մասին լրագրողների հետ զրույցում ասաց Երևանի քաղաքապետ Տիգրան Ավինյանը:
Հարցին՝ արդյոք քաղաքաշինական ծրագրերը Երևանում շարունակվում են ռազմավարական պլանի հիման վրա, թե՞ կառուցապատողն ինքն է որոշում, օրինակ, տվյալ հատվածում քանի հարկանի շենք կարող է կառուցել, քաղաքապետը պատասխանեց․«Ոչ, կառուցապատողը նման հնարավորություն չունի։ Կարող է ունենալ նման ցանկություն, բայց մենք ունենք ընդունված գլխավոր հատակագիծ»:
Քաղաքապետն ընդգծեց, որ ունեն ճարտարապետական խորհուրդ՝ բաղկացած հինգ մասնագետներից, ճարտարապետներից, որոնցից ամեն մեկը վեց ամիսը մեկ փոխարինվում է նոր ճարտարապետով, որպեսզի ընդհանուր ճարտարապետական համայնքի կարծիքը հնարավոր լինի ամփոփել այդ խորհրդում։
«Փաստացի մեր խորհուրդն է տալիս վերջնական եզրակացություն, թե որ հատվածում ինչ տեսակի շինարարություն է հնարավոր։ Մենք որոշակի նոր, ավելի խիստ կանոններ ենք սահմանել նոր համալիր շինարարությունների հետ կապված։
Հողի մակերեսները, որոնք ենթակա են կառուցապատման, նվազեցրել ենք և այդ տեսակի բազմաթիվ նոր սահմանափակումներ ենք սահմանել»,- նշեց Ավինյանը:
