Բաժանորդագրվեք Zarkerak.am-ի տելեգրամ ալիքին։
«ԵԱՏՄ-ն հստակ սահմանել է, որ որևէ անդամ պետությանը չես կարող հեռացնել: ՀՀ-ն կարծում է, որ իր դիվանագիտական բոլոր ուղիները չի սպառել ԵԱՏՄ-ն ամենայն բարձր մակարդակով աշխատացնելու, մենք կարծում ենք, որ ԵԱՏՄ-ում ՀՀ-ն ասելիք ու անելիք ունի, ակնկալում ենք ռուս գործընկերներից, որ կվերացնեն այն բոլոր սանկցիաները, որոնք անտեղիորեն կիրառվել են հայկական արտադրանքի նկատմամբ»,-լրագրողների հետ զրույցում անդրադառնալով ԵԱՏՄ Ռուսաստանի, Բելառուսի, Ղազախստանի և Ղրղզստանի միջկառավարական խորհրդի անդամների համատեղ զեկույցին՝ ասաց ՔՊ խմբակցության պատգամավոր Սոնա Ղազարյանը:
Անդրադառնալով գազի գնի հնարավոր թանկացմանը՝ Ղազարյանն ասաց. «Կարծում եմ, որ ՌԴ-ն բարեկամ հայ ժողովրդի նկատմամբ նման սանկցիաների կիրառման չի անցնի: Մենք հետևում ենք ՌԴ-ի կողմից հայ տնտեսվարողների նկատմամբ կիրառված սանկցիաների հոսքին, համարում ենք, որ դրանք անտեղի են, շարունակում ենք մեր խոսակցությունը: Չեմ կարծում, որ ՀՀ-ն երբևէ որևէ ոչ բարեկամական քայլ է արել ՌԴ-ի նկատմամբ: Խնդիրներ կան, բայց ՀՀ կառավարությունը ցանկացած քայլ անելիս նախ դրանց հիմքում ընտրում է, թե որքան են այդ գործողությունները սպասարկելու ՀՀ պետական շահը»:
Ղազարյանը նաև ընդգծեց. «ՀՀ-ի համար համար մեկ ճգնաժամը մեկ կենտրոնից այնպիսի կախվածությունն է, որը քաղաքական նպատակներով կարող է կիրառվել ՀՀ-ի և իր քաղաքացիների դեմ, մենք այս բանաձևը փոխարինել ենք՝ կախվածությունը քչերից փոխարինել կախվածությունը շատերի: Տնտեսական սանկցիաներն ունեն բացառապես քաղաքական նպատակ, մենք փորձում ենք չեզոքացնել ՀՀ-ի ներկա և հնարավորինս ապագա ճնշումների ողջ գործիքակազմը: Հայ ժողովուրդը պատեհ պահի որոշում կկայացնի, թե որ մաքսային միության անդամ է ուզում լինել»:
