Բաժանորդագրվեք Zarkerak.am-ի տելեգրամ ալիքին։
«Առողջության համակարգի ներդրումից հետո 200 հազար պլյուս աշխատավարձ ստացող անձնանց թիվը բավականին մեծացել է՝ հենց այդ որոշման բերումով»: Այս մասին Կառավարության նիստի ընթացքում հայտարարեց վարչապետ Նիկոլ Փաշինյանը՝ անդրադառնալով առողջության համընդհանուր ապահովագրման մասին օրենքում փոփոխություններ կատարելու մասին զեկույցին:
«Հիմա մենք ըստ էության ասում ենք, որ ուզում ենք գործատուները բարձրացնեն իրենց աշխատողների աշխատավարձերը: Ուզում ենք, որ գոնե 200 պլյուս աշխատավարձ ստանան: Ասում ենք նաև հետևյալը. «Հունվարի մեկից պետք է նաև մասնակցեք մինչև 200 հազար ստացողի առողջության ապահովագրման ձեռք բերմանը»: Ընդ որում 2027 թվականի հունվար 1-ից Կառավարությունը, այսինքն պետական բյուջեն կմասնակցի գործընթացին, այսինքն 4400 դրամը կվճարվի պետական բյուջեից, 4400 դրամը կվճարի գործատուն և 2000 դրամը կվճարի աշխատողը»,-ասաց վարչապետը:
Նա նաև հավելեց, որ 2027 թվականի ընթացքում Կառավարությունը այս աջակցությունը կտրամադրի, սակայն 2028 թվականի հունվարի 1-ից բյուջեն դուրս կբերվի այս գործընթացից:
«Վճարումը կատարվելու է հետևյալ տրամաբանությամբ. Մի մասը պետք է արվի սոցիալական կրեդիտով, քաղաքացիները պետք է հետ ստանան իրենց վճարած եկամտային հարկից: Որքան պակասի պետք է գործատուն վճարի կամ էլ ուղղակի պետք է աշխատավարձը բարձրացնի գործատուն՝ աշխատավարձը դառնա 200 հազար պլյուս և ինքը այդտեղից դուրս գա ու աշխատողին մենակ թողնի առողջության ապահովագրման վճարման համակարգից: Օրենքի ամենամեծ ու ֆունդամենտալ փոփոխությունը սա է: Փաստորեն այսպիսով մենք ևս 350 հազար քաղաքացու ներառում ենք առողջության ապահովագրության համակարգի մեջ: Սա կարծում եմ շատ կարևոր է մարդկանց բարեկեցությունը բարձրացնելու իմաստով»,-ասաց Փաշինյանը:
Վարչապետը նաև ներկայացրեց 2026 թվականի առաջին 9 ամիսների ընթացքում առողջության ապահովագրության ապահովման տրմադրամն տվյալները՝ նշելով Կառավարությունը կենտրոնացած է 65 պլյուս տարիք ունեցող քաղաքացիների վրա:
«Այս ընթացքում 65 պլյուս տարիքի 26914 թոշակառու օգտվել է1 մլն դրամ և ավել ծառայություններից, որը կարող է լինել նաև 2 մլն, 3 մլն, 4 մլն: Իսկ 500 հազար դրամից ավել ծառայություններից օգտվել է 62116 կենսաթոշակառու: Ուզում եմ նաև, որ ընդհանուր մասշտաբները հասկանանք: Ընդհանուր առմամբ բոլոր խմբերից 500 հազարից ավել արժեք ունեցող ծառայություններից օգտվել է 97580 մարդ: Սա ակնհայտ է դարձնում, թե որքան կարևոր է այդ բարեփոխումը, որը տեղի է ունեցել»,-ասաց վարչապետը:
