Բաժանորդագրվեք Zarkerak.am-ի տելեգրամ ալիքին։
Նոր լիարժեք թափ է ստանում ապօրինի գույքի վերադարձի համակարգը, ընդ որում այս անվան ներքո ի նկատի ունենք հանրային շահերի, պետական շահերի գործիքների կիրառումը: Այս մասին Կառավարության նիստի ընթացքում հայտարարեց վարչապետ Նիկոլ Փաշինյանը՝ անդրադառնալով՝ ՀՀ Կառավարության 2026-2031 թվականների գործունեության միջոցառումների հաստատելու մասին հարցի քննարկմանը:
Վարչապետը նաև նշեց, որ համակարգը կայացած է, չնայած անթերի չէ և կշարունակի բարեփոխումներին զուգահեռ զարգանալ:
«Նախօրեին խորհրդարանում կատարված քննարկումները կարևոր եմ համարում, որովհետև անկախ իրենց տոնայնությունից: Ի հայտ եկավ թիվ մեկ բարերարի թեման: Կարծում եմ այդտեղ էլ ճիշտ տեղ հասանք, որովհետև էլի ուզում եմ ընդգծեմ, որ ՀՀ թիվ մեկ բարերարը ՀՀ Կառավարությունն է և քաղաքական մեծամասնությունը: 2018 թվականի ոչ բռնի թավշյա հեղափոխության արդյունքներով ճշգրտված տվյալներով 9,1 մլրդ դոլար լրացուցիչ մուտքեր ենք ունեցել պետական բյուջե: Հայաստանի օլիգարխիայի բազմահազարամյա պատմության մեջ չկա համեմատելի ծավալ, որ ժողովրդին նման բարերարություն արած լինի: Սա այն 9,1 մլրդն է, որի գողացված չնչին մասերով մարդիկ տուկի թել էին բաժանում, բրինձ էին բաժանում, ատամի պրոթեզ էին բաժանում: Այսինքն դա արվում էր գողացածի շուրջ բարերարության ծխածածկույթ ստեղծելու համար»,-ասաց Փաշինյանը:
Նա կարևորեց, որ իրավապահ համակարգը սկսել է ժողովրդի տված մանդատի շրջանակներում գործել:
«Առանց սեթևեթանքի ասում եմ, մարդիկ գտնում են իրենց արժանի տեղը: Հույս ունեմ մեր դատական համակարգը դանդաղ արդարադատություն կիրականացնի»,-ասաց վարչապետը:


