Շարժումն արդեն մարել է, եթե չմարեր, Գալստանյանը հիմա ասուլիս չէր տա, կլիներ փողոցում. եթե այս շարժումն օրակարգ թելադրի, դա կլինի մահացու հարված ՀՀ-ի պետականությանը. Դավիթ Ստեփանյան

«Շարժման բովանդակությունը մնում է նույնը, քաղաքական բաղադրիչը ևս»,- այս մասին այսօր հրավիրված ասուլիսի ժամանակ հայտարարեց Բագրատ Գալստանյանը:

Նշենք, որ խոսքը սահմանազատման գործընթացի և իշխանափոխության պահանջի մասին է:

«Մեր ժողովուրդը և՛ սահմանազատման, և՛ Փաշինյանի հրաժարականի մասով իր պատասխանն արդեն տվել է: Սահմանազատման առաջին փուլը, որը տեղի է ունեցել, եղել է խայծ՝ Հայաստանի կողմից Ադրբեջանին, որը ներկայացրել է պահանջներ չորս գյուղերի մասով, խայծը տվել ենք, հիմա սպասում ենք գործընթացի շարունակությանը: Իմ տեղեկություններով Գեղարքունիքում արդեն պատրաստվում են սահմանազատման երկրորդ փուլին, որի ժամանակ արդեն Ադրբեջանն  է տարածքներ հանձնելու, օկուպացված տարածքները:

Այս գործընթացը բաց է, ժողովուրդը գիտի՝ այստեղ թաքուն, գաղտնի կետեր չկան, հիմա հարց՝ համապատասխանո՞ւմ է մեր շահերին, որպեսզի այս գործընթացը շարունակություն ունենա, մենք տեսնում ենք, որ միջազգային դերակատարները՝ առաջին հերթին ԱՄՆ-ն և ԵՄ-ն, ամեն ինչ անում են, որպեսզի Ադրբեջանը գնա այդ ամենին, այդ թվում կան ռիսկեր, մենք առաջին օրվանից նշել ենք այդ ռիսկերը, բայց ես կարծում եմ, որ ժամանակը ցույց կտա, որ սահմանազատումը շարունակվելու է և շարունակվելու է արդեն ի նպաստ Հայաստանի: Քանի որ հիմա այլընտրանք չկա, իրենք այս ամբողջ ընթացքում այլընտրանք չեն ներկայացրել, հասարակությունը տեսնում է, որ ճանապարհը սա է, ինչի՞ համար դուրս գա մի գործընթացի դեմ, որին այս պահին մենք սպասում ենք և որն ի օգուտ մեզ է»,- Zarkerak.am-ի հետ զրույցում ասաց քաղաքագետ Դավիթ Ստեփանյանը:

Խոսելով իշխանափոխության պահանջի մասին՝ քաղաքագետն ասաց. «Բոլորն էլ գիտեն, որ Փաշինյանի իշխանությունը կատարյալ չէ, բայց Փաշինյանի իշխանությունն այսօր ամեն ինչ անում է, որպեսզի մենք չկորցնենք մեր անկախությունն ու ինքնիշխանությունը, նրանք փորձում են անել այնպես, որպեսզի Ադրբեջանը Հայաստանի վրա այլևս հարձակվելու հնարավորություն չունենա: Հայաստանի հասարակությունն ուզո՞ւմ է, որ մենք ունենանք այսպիսի խաղաղություն, թե՝ ոչ, եթե մեր ժողովուրդը դա չուզեր, հիմա Բագրատ Գալստանյանն ասուլիս չէր տա, նա կլիներ փողոցում հարյուր-հազարավոր մարդկանցով շրջապատված և ԱԺ-ն հիմա Նիկոլ Փաշինյանին անվստահություն կհայտներ: Եթե սա տեղի չի ունենում, ուրեմն նշանակում է, որ ժողովուրդն այդ պահանջը չի կիսում՝ ո՛չ սահմանազատման մասով, ո՛չ իշխանափոխության: Եթե ժողովուրդն այս ամենը չի կիսում, ինչ պայքարի մասին է խոսքը, մի քանի հազար հոգի դժգոհ են, շատ լավ թող դժգոհեն, հիմա այդ մի քանի հազար հոգու պատճառով քաղաքականությո՞ւն փոխենք»:

Գալստանյանը նշեց, որ շարժման շուրջ համախմբում կա և ոչ ոք պայքարից չի հրաժարվում: Դավիթ Ստեփանյանի խոսքով՝ Գալստանյանն ինչ ուզում է հայտարարի, միևնույնն  է շարժումը դատապարտված է անհաջողության. «Շարժումն արդեն մարել է, նորից եմ ասում, եթե շարժումը չմարեր, Բագրատ Գալստանյանը հիմա ասուլիս չէր տա, ինքը կլիներ փողոցում, այն, որ նա ասուլիս է տալիս, արդեն իսկ նշանակում է, որ շարժումը մարել է: Հիմա իրենք կարող են հավաքվել, ինչ-որ ելույթներ ունենալ, ասուլիսներ տալ, ասել, որ իրենք համախմբված են, բայց մենք տեսնում ենք, որ նույնիսկ Սուրեն Պետրոսյանը չկա հիմա իրենց կողքին, իրենց այն կերպարներից մեկը, որն այս շարժման ակունքներում է եղել, այսօր իրենց կողքին չէ, ես չգիտեմ՝ որտեղ է, և այն պատասխանը, որով Գալստանյանը փորձում է բացատրել, թե ինչու նա չկա՝ համոզիչ չէ, էլ ինչ համախմբման մասին է խոսքը, դե թող ցույց տան՝ այդ համախմբումն ո՞ւմ միջև է, միայն խոսքեր են, թող անուններ տան, ո՞ւր են այդ մարդիկ, ես չեմ տեսնում այդ համախմբումը»:

Շարժումը շարունակելու է փողոց դուրս գալ՝ հայտարարեց Գալստանյանը՝ նշելով, որ իրենք են օրակարգ թելադրելու. «Այո, կարող են հավաքվել, նորից ինչ-որ հանրահավաք անել, բայց արդյո՞ք դա լուրջ է, ես կարծում եմ՝ լուրջ չէ, որովհետև հասարակությունը չի կիսում իրենց պահանջները: Եթե այս շարժումն օրակարգ թելադրի, դա կլինի մահացու հարված Հայաստանի պետականությանը, որովհետև այդ մարդիկ այն մտքերը, որ այսօր ուզում են տարածել, շատ վտանգավոր են, որովհետև սա ուղղված է մեր երկրի ինքնիշխանության դեմ: Հիմա գործընթաց է գնում, Հայաստանը կամաց-կամաց շրջվում է դեպի Արևմուտք, աշխարհաքաղաքական ընտրություն է կատարում, մենք ռեգիոնալիզմից թեքվում ենք դեպի արևմտամետություն, սա մեր սխալների հետևանքն է, որը գործել ենք վերջին 30 տարվա ընթացքում և այդ սխալները գործել են այն մարդիկ, ովքեր կանգնած են Բագրատի և այս շարժման հետևում. հիմա նորից վերադառնալ այդ օրակարգին, ինչի մասին խոսում է Բագրատ Գալստանյանը, նշանակում է հերթական անգամ ամեն ինչ քանդել, ոչնչացնել այն, ինչ հիմա գոնե կա և նորից վերադառնալ անցյալ, իսկ անցյալում մեզ հետ շատ վատ բաներ են տեղի ունեցել:

Հիմա մենք փորձում ենք մեր ապագայի համար ստեղծել հիմքեր, ես կառավարության գործունեության մեջ դա եմ տեսնում: Աստված մի արասցե, որ այս շարժումն ունենա այն հաջողությունները, որի մասին իրենք խոսում են, որովհետև մեզ հերթական անգամ մի այնպիսի փոսի մեջ են գցելու, որ մենք երանի կտանք Փաշինյանի ժամանակներին»:

Խոսելով նաև Գալստանյանի այն հայտարարության մասին, որ իշխանությունն ընդունակ է գնալ արյան հեղման՝ մեր զրուցակիցն ասաց. «Ես իրենց հարց կտայի՝ իսկ իրենք ինչի են պատրաստ հանուն իշխանության, պարզ չի, որ իշխանությունը պետք է պաշտպանվի, լեգիտիմ իշխանություն է, իրենք եկել մի քանի հազար հոգով ուզում են ԱԺ-ն գրավել, ուզում են մի քանի հազար հոգով օրակարգ թելադրել, ուզում են ամբողջ ժողովրդի ցանկությանը հակառակ մեզ տանել դեպի Ռուսաստան, սա ողջամի՞տ է: Փաշինյանի թիմը գոնե ընտրություններով է եկել իշխանության, բա իրենք ինչպե՞ս են ուզում գալ, հակասահմանադրական ճանապարհո՞վ: Իսկ բոլոր գործողությունները, որոնք Ոստիկանությունն արել է ԱԺ-ի շենքի մոտ, եղել են օրինական, հակասահմանադրական գործողություններ են արել, հենց Ոստիկանության իրավասության մեջ է մտնում նման բաները կանխելը»:

Գալստանյանը նշեց, որ իրենք արտաքին աջակցություն չունեն և նաև, որ այս շարժումը կապ չունի նախկինների հետ.  «Բագրատ Գալստանյանը փորձում է ներկայացնել, որ ինքը, կամ մարդիկ, որոնք կանգնած են այդ շարժման հետևում՝ Ռուսաստանի հետ որևէ կապ չունեն: Այդ դեպքում մեկ հարց՝ ես շատ կուզեի, որ Բագրատ Գալստանյանը ցույց տար իրենց ֆինանսական աղբյուրները, շարժումը մեծ գումարներ է ծախսում, այդ ամենն անվճար չի լինում, թող ցույց տան՝ որտեղից են իրենց գումարները, երբ իրենք դա անեն և մենք տեսնենք, որ այդտեղ չկա Ռոբերտ Քոչարյանի, ՍԵրժ Սարգսյանի, Ռուսաստանի հայերի անունները, այդ ժամանակ մենք կարող է իրենց հավատանք: Ժողովուրդն ամեն ինչ շատ լավ տեսնում է և դրա համար Բագրատ Գալստանյանի կողքին ժողովուրդ չկա, կան մի քանի հազար խաբված կամ գնված մարդիկ: Նա փորձում է մարդկանց հավատացնել, որ իրենք նախկինների հետ կապ չունեն, սակայն բոլորը գիտեն, որ դա այդպես չէ»:

Գալստանյանը համեմատեց հունիսի 12-ին տեղի ունեցածը մարտի 1-ի գործողությունների հետ: Դավիթ Ստեփանյանի կարծիքով՝ նման համեմատություն անելն ադեկվատ չէ. «Մարտի 1-ին ժողովուրդը դուրս է եկել կեղծված ընտրությունների դեմ, հունիսի 12-ին ժողովուրդը դուրս է եկել հակասահմանադրական պահանջով և փորձել է ուժով այդ հակասահմանադրական, ոչ լեգիտիմ պահանջն իրականություն դարձնել: Մարտի 1-ին անհայտ մարդիկ կրակել են մարդկանց վրա և սպանել են նրանց, հունիսի 12-ին ոչ մեկին չեն սպանել,  և երրորդ, եթե Բագրատ Գալստանյանի տրամաբանությամբ Նիկոլ Փաշինյանը պատասխանատու է Մարտի 1-ի համար, որովհետև նա հրահրել է դա, ուրեմն հենց Բագրատ Գալստանյանն անձամբ պատասխանատու է այն ամենի համար, ինչը տեղի է ունեցել հունիսի 12-ին: Եթե տրամաբանությունը հետևյալն է, որ այն ժամանակ մեղավոր էր ընդդիմությունը, ուրեմն հիմա էլ է այդպես, ես այստեղ որևէ համեմատության եզրեր չեմ տեսնում»:

Ինչ վերաբերում է շարժումը վերադասավորելու մասին հնչած հայտարարությանը՝ Ստեփանյանը նշեց. «Նրանք հասկացել են, որ այսպես ոչ մի բանի չեն կարող հասնել, ես չեմ կարող հասկանալ, թե ինչպես նրանք պետք է վերադասավորվեն, որ ինչ-որ բանի հասնեն: Նրանց համար ինչ-որ բանի հասնելու միակ տարբերակն իշխանության սխալներն են: Եթե հիմա իշխանությունն այնպիսի սխալ գործի, որ ժողովուրդը դրա դեմ ընդվզի, միայն այդ դեպքում նրանք դա կարող են օգտագործել, եթե իշխանությունը շարունակի անել այն, ինչ հիմա անում է, նրանց այդ շարժումն արդեն որևէ հեռանկար չի ունենա»:

Աննա Բզնունի