Բաժանորդագրվեք Zarkerak.am-ի տելեգրամ ալիքին։
«Երբ մի պետություն մի քանի ուղղություններով պատերազմի մեջ է, նման միջադեպերից խուսափելը գրեթե անհնար է: Ակնհայտ է մի բան, որ Իրանը չի ցանկանում Թուրքիային ևս ներքաշել պատերազմի մեջ և ընդլայնել հակառակորդների շրջանակը, հետևաբար այս պայմաններում գրեթե կասկածից վեր է, որ պարբերաբար Թուրքիայի տարածքում իրանական հրթիռների հայտնվելը կա՛մ սխալ հաշվարկների հետևանք է, կա՛մ էլ սադրանք Իրանի հակառակորդների կողմից»,- Zarkerak.am-ի հետ զրույցում ասաց արևելագետ Արմեն Պետրոսյանը:
Հիշեցնենք, որ արդեն երկրորդ անգամ ՆԱՏՕ-ի ուժերը խոցել են Թուրքիայի օդային տարածք մտած իրանական բալիստիկ հրթիռները:
Ըստ Պետրոսյանի՝ Թուրքիայի արձագանքը շատ բնական և օբյեկտիվ է. «Թուրքիան իր հերթին պետք է նախ և առաջ ամրապնդի իր դիրքերը տարածաշրջանում և աշխարհում, մեծացնի վստահությունն իր ուժային և քաղաքական կարողությունների նկատմամբ տարածաշրջանում ու սեփական հանրության շրջանում և ավելի ամրապնդի իր ռազմավարական դիրքավորումն այս հակամարտության շրջանակներում, որն է չեզոքությունը և հնարավորության դեպքում միջնորդության իրականացումը»:
Արմեն Պետրոսյանի դիտարկմամբ՝ Թուրքիան երկու պարագայում կարող է ներգրավվել այս պատերազմի մեջ. «Դա կլինի, երբ Իրանն ինքը թիրախավորի Թուրքիայի տարածքը՝ վստահ լինելով, որ Թուրքիայի տարածքն օգտագործում են իր հակառակորդները, այսինքն՝ նույն ՆԱՏՕ-ի ռազմաբազներն օգտագործում են ակտիվ ռազմական գործողություններ իրականանցելու համար: Երկրորդը, եթե Թուրքիան տեսնի, որ կա ռազմավարական հնարավորություն այդ հակամարտությունից ավելի մեծ օգուտներ քաղել և իր հաշվարկներով արդեն ներքաշվել պատերազմի մեջ հստակ և չափելի ձեռքբերումներ ունենալու նպատակով: Սակայն սա այս պահին ամենաանհավանական սցենարն է»:
Պետրոսյանը նաև նշեց, որ Թուրքիայից հասկանում են, որ այդ քայլն Իրանի կողմից միտումնավոր չի արվել և եթե հակառակը լիներ, իրենք նախահարձակ կլինեին և շատ ավելի մեծ հաջողություններ կունենային. «Քանի որ այս պահին Թուրքիան պատասխանելու տրամադրվածություն ու նպատակ չունի, դրա համար սահմանափակվում է հռետորաբանությամբ»:
Անդրադառնալով Իսրայել-Իրան պատերազմի ընթացքին՝ արևելագետն ասաց. «Պատերազմի ավարտի հետ կապված առաջիկա գոնե մեկ շաբաթվա ընթացքում որևէ հիմքեր չկան, իսկ արվող հայտարարությունները գուցե քարոզչական և քաղաքական հիմքեր են որևէ պահի պատերազմը դադարեցնելու համար: Ամուր դիրքերում հարձակվող կողմն է, Իրանը ռազմավարական առումով էականորեն թուլացել է և նրանց միակ ձեռքբերումն այս պահին այն է, որ վարչակարգը դեռևս անսասան է»:
