Բաժանորդագրվեք Zarkerak.am-ի տելեգրամ ալիքին։
Եթե ձեզ թվում է, որ մենք բարեկիրթ ենք և դա նշանակում է, որ լինելու ենք նաև մեղմ, դուք սխալվում եք: Այս մասին խորհրդարանում ելույթի ժամանակ հայտարարեց ԱԺ նախագահ Ռուբեն Ռուբինյանը՝ անդրադառնալով ընդդիմության կողմից ընտրակաշառքներ բաժանելու վերաբերյալ ձայնագրություններին:
«Մենք լինելու ենք բարեկիրթ, բայց ոչ ոք երբեք չի մոռացել, ու չի մոռացվելու, որ դիմում էիք համակարգված ընտրակաշառքի սխեմայի, որը ձեր համապատասխան քաղաքական ուժերը գործարկել են ինչը ակնհայտորեն բխում է հրապարակված ձայնագրությունից»,-ասաց ԱԺ նախագահը:
Դիմելով «Հայաստան» դաշինքին՝ Ռուբինյանը հարցրեց, թե ինչու էին ձայնագրությունների մեջ իրենց աջակիցները վախենում որոշ բառեր հստակ արտահայտելուց և փոխարենը օգտագործում էին կոդային «քաբաբ» բառը:
«Ինչու էին վախենում, որ այդ բառը ասելուց խնդիրներ կունենային: Կամ խոսում ենք Ղարաբաղից մեր քույրերի և եղբայրների իրավունքներից և լավ ենք անում, բայց կարող եք բացատրել, այդ ինչ ձայնագրություններ էին, որ ձեր թիմի ներկայացուցիչները խոսում են մի ղարաբաղցուց, հայհոյում էին և ասում «էդքան բան արեցինք իրենց համար, ինքը մեզ չի ընտրելու»: Սրանք ինչ տասնյակ ու հարյուրավոր ձայնագրություններ են, որոնցում ենթադրաբար խոսում են մարդկանց փող տալու մասին, որպեսզի իրենց ընտրեն»,-ասաց Ռուբինյանը:
Անդրադառնալով ԲՀԿ ձայներին Ռուբինյանը նշեց, որ խմբակցությունը չի ստացել ձայներ այդ տեղամասերում, որտեղ ըստ ընդդիմության կատարվել էին «ձայների գողություն»:
«Այդ ձայները չկան ի բնե, որովհետև այդ ձայները համարվել են անվավեր»,-ասաց ԱԺ նախագահը:
Անդրադառնալով ընդդիմության կողմից հնչեցրած այն հարցադրումներին, թե ինչու է իշխող ուժը վերջին հայտարարությունների մեջ ՀՀ տարածքը ներկայացնում ոչ թե որպես 29.800 կմ քառակուսի և փոխարենը օգտագործում է 29. 743 կմ քառակուսի ձևակերպումը Ռուբինյանը ասաց. «ՀՀ տարածքը միշտ էլ եղել է 29. 743 կմ քառակուսի, որվհետև հանրագիտարանում գուցե վերնագրում կլորացված թիվն է եղել իսկ բուն նյութի մեջ ոչ»:
«Ինձ այստեղ, որքան էլ տարօրինակ չէ, օգնության կհասնեն Ռոբերտ Քոչարյանն ու Դաշնակցությունը: Դաշնակցությունը 2005 թվականին կոալիցիայի մեջ էր Ռոբերտ Քոչարյանի նախագահության օրոք: 2005 թվականին ՀՀ Կառավարությունը, եթե չեմ սխալվում նույնիսկ Քոչարյանի ստորագրությամբ վավերացրել է Հայաստանի հողային ֆոնդի առկայության և բաշխման վերաբերյալ հաշվետվությունը: Այնտեղ գիտեք ինչ է գրած, որ ՀՀ հողային ֆոնդը բաղկացած է 2974.3 հեկտարից: Սա էլ, որ բաժանեք համապատասխան թվի կստանաք 29. 743 կմ քառակուսի: Նույնը եղել է 2010 թվականին և 2015 թվականին: Հետևաբար, երբ ասում եք պարոն Խաչատրյան, թե որտեղից ենք վերցրել 29. 743 կմ քառակուսին, ուրեմն ասեմ, վերցրել ենք ձեզնից»,-ասաց ԱԺ նախագահը:
