Բաժանորդագրվեք Zarkerak.am-ի տելեգրամ ալիքին։
«Մեր տնտեսական դիմակայունությունը մեծացնելու առումով շատ էական է, որպեսզի կարողանանք հնարավորինս շուտ հասնել տարածաշրջանային հաղորդակցությունների բացմանը: Երեկվանից դե յուրե ԱԺ-ում մեկնարկեց ԹՐԻՓՓ նախագծի վերաբերյալ ՀՀ-ի և ԱՄՆ-ի միջև ստորագրված համաձայնագրի վավերացման գործընթացը և ԱԺ առաջիկա նստաշրջանում վավերացումը տեղի կունենա: Երեկ փոխվարչապետ Գրիգորյանի գլխավորությամբ աշխատանքային խումբ է մեկնել Սյունիքի մարզ, տեղում աշխատել է ԹՐԻՓՓ նախագծի իրագործման գործնական փուլը մեկնարկելու տրամաբանությամբ»,-Կառավարության նիստում ասաց վարչապետ Նիկոլ Փաշինյանը:
Փոխվարչապետ Մհեր Գրիգորյանը ներկայացրեց այցի մանրամասները. «Այս փուլում խոսքը վերաբերում է երկաթգծին, ավտոճանապարհին և էներգետիկ ենթակառուցվածքին՝ լարանցմանը: Երկաթգծի հետ կապված ամեն ինչ պարզ է, ուզում էինք տեղում հասկանալ ամրաշինական կոնստրուկցիաների վիճակը, թե որտեղով է անցնելու, կարծում եմ՝ ակնհայտ է: Ավտոճանապարհի հետ կապված մոդելավորման հարցեր դեռևս կան, որովհետև կան բարդ անցանելի հատվածներ, ճանապարհը պետք է մրցունակ լինի, էլեկտրահաղորդման գծերի հետ կապված ամեն ինչ շատ պարզ է, իհարկե վերջնականացնելու բաներ կան, այս երեք ենթակառուցվածքի մասով կարող ենք սկսել նախագծման աշխատանքները»:
Փաշինյանի խոսքով՝ մտնում են գործնականացման փուլ:
ԱԺ-ում անցացված քննարկումների հետ կապված էլ արձագանքեց Արտաքին գործերի և միջազգային առևտրի նախարար Արարատ Միրզոյանը. «Եզրափակիչ փուլ ենք մտել ընկերության հիմնադրման փաստաթղթային փուլի առումով: Ապաշրջափակման, ենթակառուցվածքների բացման մասով բավական դրական ընկալում կա, բայց հետաքրքիր էր տեսնել, որ շատ մեծ հետաքրքրություն կա նաև խաղաղության համաձայնագրի շուրջ: Խաղաղության համաձայնագրի շուտափույթ ստորագրումը մեր կառավարության քաղաքական հանձնառությունն է»:
