Բաժանորդագրվեք Zarkerak.am-ի տելեգրամ ալիքին։
«Լինելու են խաղի կանոններ, ովքեր տեղավորվում են դրանց մեջ, կաշխատեն»,- Zarkerak.am-ի հետ զրույցում այս մասին ասաց Անշարժ գույքի գործակալությունների ասոցիացիայի խորհրդի անդամ Անդրանիկ Հարությունովը՝ անդրադառնալով Կադաստրի կոմիտեի կողմից շրջանառության մեջ դրված և կառավարության հավանությանն արժանացած նախաձեռնությանը, որն անշարժ գույքի ոլորտում սահմանելու է հստակ կարգավորում՝ մասնավորապես ով է անշարժ գույքի գործակալը, ինչ կարգավիճակ ունի, պարտականություններ և պատասխանատվության տիրույթ:
Ոլորտի մասնագետի խոսքով՝ նախաձեռնությունն ունի շուրջ երկու տարվա պատմություն, սպասված է, հիմա հերթը ԱԺ գնալունն է, ասոցիացիան էլ ներկայացրել է առաջարկներ, որոնք ներառվել են դրանում:
Իսկ թե ինչու է կարևոր օրենքում հստակ ամրագրելը, թե ով կարող է համարվել անշարժ գույքի գործակալ և ինչ դա կարող է փոխել ոլորտում՝ բացատրեց.«Մինչև հիմա այս կետերը չեն եղել, սահմանված չի եղել թե ով է անշարժ գույքի գործակալը: Երբ քաղաքացիները խնդիրներ էին ունենում իրավական, թեկուզ՝ բարոյական հարթակում, ոչ մեկը չէր կարող ասել կոնկրետ այդ գործակալը կամ իրավաբանական անձը ճիշտ է վարվել, թե սխալ, պարտականությունները կատարել է, թե ոչ, խաղի կանոններն ի սպառ բացակայում էին: Դատարաններում բազմաթիվ գործեր կան, որտեղ խնդիրն առաջացել է գործակալի ոչ պրոֆեսիոնալ լինելու հետևանքով, բայց քանի որ ոչ մի տեղ հստակ չկա նրա պարտականությունների շրջանակը, ոչ մի պատասխանատվություն չի մնում գործակալի վրա»:
«Տանը նստած ամեն մեկն իրեն համարում է գործակալ ու իր ձևով է ծառայություն մատուցում»:
Հարությունովը վստահեցրեց, որ փոփոխությունը շատ լուրջ խնդիրներ է լուծելու.«Շատերը փորձում են որակյալ ծառայություն մատուցել և օրինակելի հարկատուներ են, բայց դաշտում կան ընկերություններ, անհատներ, ովքեր ոչ միայն նման ձգտում չունեն, այլև հարկեր չեն վճարում: Նրանք ցածր գներով են ծառայություններ մատուցում ու քաղաքացիների մոտ հարց է առաջանում՝ ո՞նց է ստացվում մի ընկերություն ծառայության համար «իքս» տոկոս է վերցնում, ինչ-որ մեկը 2-3 անգամ էժան, բնական է, որ երկրորդը հարկեր չի վճարում»:
Ըստ առաջարկության, անշարժ գույքի գործակալ համարվելու համար անձը պետք է ունենա բարձրագույն կրթություն և հանձնի քննություն՝ մասնագիտական գիտելիքները ստուգելով հարցաշարով.«Անձին որակավորում տալու համար լինելու է լիցենզավորման հանձնաժողով»:
Հարությունովի համոզմամբ, այս փոփոխությունը կարևոր է նաև միջազգային հարթակում մեր շուկան ներկայանալի դարձնելու համար.«Ուզում ենք շուկան միջազգային դառնա, դրա համար պետք է կանոնակարգում: Մինչև վերջերս շուկան աշխատում էր տեղացիների ու սփյուռքի ուղղությամբ, առքուվաճառքի տարեկան գործարքներում միայն մեկ տոկոսն էին օտարերկրյա քաղաքացիներ, մինչդեռ Վրաստանում մոտ 50 տոկոսն են: Տարիների ընթացքում ՀՀ շուկան ինչ-որ չափով դարձավ միջազգային և կարիք առաջացավ, որ դրսից անշարժ գույքով հետաքրքրվողները գործ ունենան իրապես մասնագետների հետ. ռուս -ուկրաինական պատերազմի ընթացքում մեծ թվով ռուսներ պարզապես խաբվել են տեղի գործակալների կողմից»:
Ինչ վերաբերում է փոփոխությունների գործարկման ընթացքին՝ նա նշեց.«Օրենքն ընդունելուց հետո բնակարանի վաճառքի հայտարարություն կարող են տալ միայն այն գործակալները, ովքեր սեփականատիրոջ հետ կունենան ծառայությունների մատուցման պայմանագիր, և կոնկրետ գույքի նույնականացում՝ Կադաստրի կոմիտեի միասնական բազայում: Այսօրվա ամենամեծ խնդիրներից մեկը ֆեյք հայտարարություննեն են: Ոչ մի տեղ իրավունք չի լինելու տեղադրել հայտարարություն՝ առանց համապատասխան ստուգման, կարծում եմ հարթակներն էլ պետք է հետևեն սրան»:
Նաև նշեց, որ այս գործընթացը գործակալների վրա հավելյալ պարտավորություններ չի դնելու, ծառայությունների գները փոխելու միտումներ չկան.«Ընդհանուր առմամբ, առաջարկվող փոփոխությունը խնդիր է ստեղծելու այն ընկերությունների համար, ովքեր խուսափում են հարկեր վճարելուց և բարեխիղճ աշխատանքից»:
