Հայաստանը կմասնակցի «ԷՔՍՊՈ-2027» համաշխարհային ցուցահանդեսին

Բաժանորդագրվեք Zarkerak.am-ի  տելեգրամ ալիքին։

Հայաստանի Հանրապետությունը մասնակցելու է Սերբիայի Հանրապետության Բելգրադ քաղաքում անցկացվող «ԷՔՍՊՈ-2027» համաշխարհային ցուցահանդեսին: Այս առիթով ԿԳՄՍ նախարարությունը հայտարարում է ազգային տաղավարի և այլ միջոցառումներին մասնակցության բովանդակության հայեցակարգի ներկայացման բաց կանչ։ Այդ մասին հայտնում են ԿԳՄՍՆ-ից:

Նպատակն է ստանալ միջազգային չափանիշներին համապատասխան, նորարարական և բովանդակային առումով ամբողջական հայեցակարգ, որը կներկայացնի Հայաստանի Հանրապետությունը՝ ընդգծելով երկրի մշակութային բազմազանությունը, պատմական ժառանգությունը, ժամանակակից ձեռքբերումները և ապագայի տեսլականը։

Ցուցահանդեսը կայանալու է 2027 թվականի մայիսի 15-ից օգոստոսի 15-ը՝ «Խաղ մարդկության համար. սպորտ և երաժշտություն բոլորի համար» խորագրով:

Հայեցակարգի հիմնական պահանջներ

1. Նախագիծը պետք է ներառի՝

• գլխավոր գաղափար և համապարփակ սյուժետային լուծում, որը համահունչ է «ԷՔՍՊՈ-2027» թեմատիկ շրջանակին և պահանջներին (տե՛ս https://expobelgrade2027.org/en/intro),
• տաղավարի գեղարվեստական լուծում և դիզայն՝ ներառյալ միջավայրի կազմակերպում, նյութերի ընտրություն և ընդհանուր էսթետիկ մոտեցում,
• տեսողական ներկայացում՝ մուդբորդեր, էսքիզներ, 3D նախնական պատկերներ կամ մուլտիմեդիա ներկայացում և այլն,
• ինտերակտիվ, թվային կամ բազմամեդիա լուծումների նկարագրություն, որոնք կնպաստեն այցելուների ներգրավվածությանը,
• տեխնիկական և ֆունկցիոնալ լուծումների նկարագիր՝ ներառյալ կառուցման, տեղադրման, աշխատանքի լոգիստիկ, ժամանակագրական և անվտանգության հիմնական մոտեցումները,
• նախնական բյուջե (ծախսերի նախահաշիվ), որը կներառի նախագծման, արտադրության, տեղադրման, լոգիստիկայի և շահագործման ծախսերը։

2. Բաց կանչին կարող են դիմել կազմակերպություններ, ստեղծագործական ստուդիաներ կամ կոնսորցիումներ, որոնք՝

• ունեն ցուցահանդեսային տաղավարների, թանգարանային կամ մշակութային ինստալյացիաների ոլորտներում իրականացված առնվազն երեք (3) միջազգային կամ խոշորածավալ նախագծեր,
• տիրապետում են հայեցակարգի մշակումն ու իրականացումն ապահովելու համար անհրաժեշտ մասնագիտական, տեխնիկական և արտադրական ռեսուրսներին:

Դիմումին պետք է կցված լինեն պորտֆոլիո և թիմի հիմնական անդամների CV-ներ։

3. Գնահատման չափանիշներ

Ներկայացված հայեցակարգերը կգնահատվեն հետևյալ չափանիշներով՝

• գաղափարի ինքնատիպություն և բովանդակային խորություն,
• թեմատիկ համապատասխանություն «ԷՔՍՊՈ-2027» պահանջներին,
• իրագործելիություն և տեխնիկական հիմնավորվածություն,
• բյուջեի հիմնավորվածություն,
• կազմակերպության փորձ և իրականացման կարողություններ:

4. Ներկայացման կարգ

Հայտը պետք է ներկայացնել մինչև 2025 թվականի դեկտեմբերի 27-ը ներառյալ, էլեկտրոնային փոստով՝ info@cultfoundation.am, կոնտակտային անձ՝ Օֆելյա Ազիզյան, հեռ.՝ +37493769578:

Թեմայի, տեխնիկական պահանջների և ցուցահանդեսային կանոնների վերաբերյալ մանրամասները հասանելի են կազմակերպչական կոմիտեի պաշտոնական կայքում՝ https://expobelgrade2027.org/en։