Բաժանորդագրվեք Zarkerak.am-ի տելեգրամ ալիքին։
Համապատասխան համաձայնագիրը վավերացման գործընթաց է ապրում, և TRIPP ընկերությունը հիմնադրելու շուրջ բանակցություններն ավարտին են հասնում: Այդ մասին ճեպազրույցի ժամանակ ասաց վարչապետ Նիկոլ Փաշինյանը՝ անդրադառնալով հարցին, թե ինչ փուլում է TRIPP-ի մասով հայկական հատվածի գործընթացը:
«Ոչ մի խոչընդոտ չկա, այսինքն՝ պարզ աշխատանքային գործընթաց է, որը ժամանակ է տանում, և Հայաստանի ու Միացյալ Նահանգների ներկայացուցիչներն իրար հետ աշխատում են»,- ասաց նա:
Մեկ այլ հարցի՝ ո՞րն է խաղաղությունը խոչընդոտող հիմնական խնդիրը, ի՞նչ նոր քայլեր կարող ենք ակնկալել խաղաղության գործընթացում, Փաշինյանը պատասխանեց՝ խաղաղությանը ոչ մի խոչընդոտ չկա, որովհետև խաղաղությունը հաստատված է:
«Իրադրությունն այն է, որ խաղաղությունը կա, տևում է, ուրիշ բան, որ խաղաղության ինստիտուցիոնալացման ուղղությամբ պետք է քայլեր ձեռնարկենք, և TRIPP-ն էլ է խաղաղության ինստիտուցիոնալացման քայլերից, որովհետև երբ ճանապարհները բացվեն, և տեղի ունենա հաղորդակցություն, ապաշրջափակում, դա շատ ուժեղ երաշխիք է խաղաղության, որովհետև այդ խաղաղությունից բոլոր երկրներն իրենց օգուտները կստանան:
Խաղաղության համաձայնագրի ստորագրման շուրջ աշխատանքները շարունակվելու են, և մենք շարունակում ենք ադրբեջանական կողմի հետ այդ թեմայով աշխատել»,- ասաց նա:
